Улсын начин Э.Энхбатыг хэрцгийгээр зодож, биед нь хүнд гэмтэл учруулсан МҮОХ-ны ерөнхийлөгч Н.Түвшинбаярыг үргэлжлүүлэн цагдан хорих эсвэл батлан даалтад гаргах эсэхийг шүүх өнөөдөр шийднэ. Түүнийг анх дөрөвдүгээр сарын 2-нд саатуулсан ба энэ цагаас хойш шүүх цагдан хорих хугацааг гурван ч удаа сунгасан юм.

Н.Түвшинбаярыг согтууруулах ундааны зүйл хэрэглэсэн үедээ хохирогч Э.Энхбатыг тодорхойгүй шалтгаанаар зодож, түүний биед гавлын ясны үргэлжилсэн хугарал бүхий хүнд гэмтэл санаатай учруулсан үйлдэлд Эрүүгийн хуулийн тусгай ангийн 11.1 дүгээр зүйлийн 1 дэх хэсэгт зааснаар эрүүгийн хэрэг үүсгэж, яллагдагчаар татан мөрдөн байцаалтын ажиллагаа үргэлжилж буй юм.

Түүний өмгөөлөгч батлан даалтад гаргахаар хөөцөлдөж, шүүхийн шийдвэр ч нааштай гарна гэдэгт итгэлтэй байгаа аж. Учир нь, Н.Түвшинбаяр гэм буруугаа хүлээн зөвшөөрч, хохирогчийн эмчилгээний бүхий л зардлыг хариуцна гэдгээ хэлсэн байна.

БНСУ-руу эхнэрийнх нь хамт нисэх зардал, эмчилгээний төлбөрийг тэрбээр эхний удаад өгөөд байгаа ба Э.Энхбат өчигдрөөс ухаан орж эхэлсэн нь Н.Түвшинбаярын хувьд таатай мэдээ юм. Э.Энхбат начны хувьд дохио зангаагаар өөрийгөө ойлгуулж байгаа ч мэдрэлийн төв систем ноцтой гэмтсэн учраас эрүүл саруул болж, хөл дээрээ явна гэдгийг эмч нар одоогоор хэлж чадахгүй байгаа юм. Түүнийг эхнэр нь, мөн Н.Түвшинбаярын эхнэр хоёул сахиж байгаа ба урт удаан хугацааны сэргээн засах эмчилгээ шаардлагатай гэдгийг ч эмч нар дуулгажээ.

Монголчуудын хувьд “Токио-2020” зуны олимпийн XXXII наадамд ихээхэн ач холбогдол өгч буй. Монгол Улсын тамирчдын хувьд спортын долоон төрөлд 21 тамирчин Токиог зорихоор эрхээ аваад байгаа.

Гэвч энэ чухал цаг үед МҮОХ-ны Ерөнхийлөгч шоронд байгаа нь  харамсалтай. Гэвч түүний алдаа оноог уучилна, МҮОХ-ны ерөнхийлөгчөөр үргэлжлүүлэн ажиллуулна гэдгийг Ерөнхий сайд зарлачихсан. Энэ нь Н.Түвшинбаярыг батлан даалтад гарахад чухал нөлөө үзүүлнэ гэдгийг хуульчид хэлж байна.

У.Тэргэл