Өмгөөлөгч Б.Баасанцогт гэгчийн бичлэг задарснаас хойш түүний бүхий л булхай, луйвар илэрсэн. Дуулиант, ноцтой хэргийн схем задарч, тэрбээр шүүгч нарыг өөрийн хүслээр хэргийг шийдвэрлүүлэхэд нөлөөлдөг, авлига, хээл хахуулийг хангалттай өгдөг болох нь баримтаар нотлогдсон билээ. Хамгийн гол нь түүнд үйлчилж байсан олон хүн өнөөдөр ажил төрөлгүй, нэр хүндгүй хэн ч биш болоод дуусч буй нь харамсалтай.

Тухайлбал, камерын бичлэгт дүрс нь хамт гарсан Сүхбаатар дүүргийн эрүүгийн хэргийн анхан шатны шүүхийн шүүгч Х.Идэр, Булган аймгийн шүүхийн шүүгч Д.Отгонбаатар  нарыг Шүүхийн ерөнхий зөвлөлийн Ёс зүйн хороогоор авч хэлэлцээд, шүүгч Д.Отгонбаатар, Х.Идэр нарыг албан тушаалаас нь огцруулах, харин шүүгч З.Болдбаатарыг зургаан сар цалингийн 30 хувиар хасах шийдвэр гаргасан билээ.

Ингэхдээ Д.Отгонбаатар, Х.Идэр нарыг шүүгчийн ёс зүйг умартан байж боломжгүй үйлдэл гаргасан, шүүгчдийн нэр хүндийг гутаасан хэмээн буруутгасан юм.

Цаашлаад тэдэнтэй хамт байсан АТГ-ын ажилтан П.Чулуунбаатарыг уг үйл явдлын дараахан ажлаас нь чөлөөлж арга хэмжээ тооцсон бол Б.Баасанцогтын хамсаатнаар нэрлэгдээд буй Улсын ерөнхий прокурорын орлогч прокурор Ц.Насанбатыг албан тушаалаас нь чөлөөлж, харин Нийслэлийн ерөнхий прокурор Ш.Нямдоржийн албан тушаалыг нь бууруулж, Баянзүрх дүүргийн прокуророор томилсон.

Өмгөөлөгч Б.Баасанцогтын балаг үүгээр дуусахгүй. Түүний 20 орчим шүүгчид хахууль өгсөн олон баримт ил болж,  зарим нь бантсандаа зээлсэн юм хэмээн эргүүлэн шилжүүлж, нийгэмд шударгаараа үнэлэгддэг АТГ-ын Олон нийттэй харилцах албаны дарга Г.Баасан хүртэл нэр холбогдож байх вэ.

Тэрбээр энэ тухайгаа “Баасанцогт өмгөөлөгч надаас тусламж хүссэн” хэмээсэн. Харин үүнд нь итгэсэн хүн ховор. ҮАБЗ-ийн нарийн бичгийн дарга А.Гансүх хүртэл нэр холбогдсон гээд хэлхээ холбоо үргэлжилнэ.

Цаашлаад УИХ-ын даргын захирамжаар хууль хяналтын байгууллага хуулиар хүлээсэн чиг үүргээ хэрхэн хэрэгжүүлж буйд болон хэвлэл мэдээллийн орчинд тархсан гэмт хэргийн шинжтэй мэдээллүүд нь улс орны дотоод аюулгүй байдалд сөргөөр нөлөөлөх эсэхийг судлан, санал, дүгнэлт гаргах, хууль тогтоомжийн төсөл боловсруулж, танилцуулах үүрэг бүхий ажлын хэсгийг байгуулсан билээ.

Уг ажлын хэсгийг Б.Энх-Амгалан гишүүн ахалж, бүрэлдэхүүнд нь гишүүн Б.Энх-Амгалан, Б.Баярсайхан, Ц.Сандаг-Очир, Г.Дамдинням, Ч.Ундрам нар орсон юм. Тэд Б.Баасанцогтыг шалгуулахаар АТГ, ТЕГ, ЦЕГ-т гомдол гаргасан билээ. Ийнхүү төр, засаг хүртэл өндрөө авч, хууль, шүүхийн байгууллагыг нийгэмд харлуулсан “Хонгил”-ын гэх өмгөөлөгч Б.Баасанцогттой нөхөрлөсөн, ойр дотно байсан, итгэсэн олон хүн өнөөдөр хууль, шүүхийн хаалга татаж,  ажил төрөлгүй болж гудамжинд гарч, авлига авдаг шүүгчээрээ цоллуулж,  түүний хүн гэдгээрээ адлуулж сууна.

Ямартай ч, тагнуул, цагдаагийн байгууллага Б.Баасанцогтод холбогдох хэргийг мөрдөн шалгаж эхэлсэн ба түүнтэй ашиг сонирхол нэгдсэн, гал хөл нь болсон хуулийнхан нэмэгдсээр байгаа аж. Харин уг хэргийг шүүх болоход Монголын хууль хяналтын байгууллага хэрхэн дампуурч, ёроолдоо хүрсэн нь ил болж, нийгэмд өмнө байгаагүй дуулиан, шуугиан тарина гэдгийг эх сурвалж хэлж байна. Батгана суусан газар өттэй, бадарчин явсан газар балагтай хэмээдэг дээ.

У.Тэргэл