УИХ-ын Хууль зүйн байнгын хороо хуралдаж байна. Хуралдаанаар “Монгол Улс дахь хүний эрх, эрх чөлөөний байдлын талаарх 19,20 дахь илтгэлийг хэлэлцсэнтэй холбогдуулан авах арга хэмжээний тухай” УИХ-ын тогтоолыг төслийг хэлэлцэж буй юм.

Энэ үеэр УИХ-ын гишүүн Ж.Сүхбаатар “Яг өнөөдөр УИХ, Засгийн газрыг ширтэж, найдаж суугаа иргэд, олон түмэн маань нэг зүйлийг харж байгаа. Эрүүл мэндээ хамгаалуулах, эмнэлгийн тусламж, үйлчилгээ авах Үндсэн хуульд заасан эрхээ шаардаж, энэ УИХ, Засгийн газар анхаарах юм уу гэж харж суугаа. Одоо олон мянгаараа гэртээ эмчлүүлж байна, бас олон мянгаараа эмнэлэгт эмчлүүлж байна.

Яг одоо хүндэвтэр, маш хүнд өвчтэй хүмүүс эмнэлэгт очиж чадахгүй байгаа мэдээлэл сүүлийн үед их гарч байна. Хоёрдугаарт, гэр бүлээрээ өвдөж байна. 3, 4, 5-уулаа өвдөж байна. Дунджаар нэг хүнд 200.000 төг зарж байна гэж бодоход дөрвүүлээ өвдөхөд 800.000 төгрөг болчихож байгаа юм.

Энэ тал дээр анхаарал хандуулаач ээ. Дараагийн асуудал бол гэр бүлээрээ өвдсөн хүмүүст өрхийн эмнэлэгт багцын дэмжлэг үзүүлж байна гэдэг. Үүнд чаддаг юмаа л хэлмээр байна, заавал бүгдийг чадах албагүй л дээ. Яг яах ёстой юм, ингэж чадна, ингэж чадахгүй. Та нарын хийх ажил нь энэ, төрийн хийж чадах ажил нь энэ гээд шууд зааглаад хэлчихмээр байна. Өнөөдрийн хүний эрхийн хамгийн тулгамдсан асуудал бол энэ халдвартай гэртээ байгаа иргэдийн асуудал болчихоод байна шүү” хэмээлээ.

У.Тэргэл