Үндсэн хуулийн Цэцийн хоёр гишүүний бүрэн эрхийн хугацаа хоёр жилийн өмнө дууссан ч нөхөн томилгоог хийж чадаагүй өдийг хүрээд байсан. Тэгвэл Цэцийн гишүүнд нэр дэвшигчийн нэр тодорчээ.

Тодруулбал, Улсын дээд шүүхийн нийт шүүгчийн хуралдаан өчигдөр буюу есдүгээр сарын 20-ны өдөр болж, хуралдаанаас олонхын санал авсан Дашбалбарын Гангабаатарыг Үндсэн хуулийн цэцийн гишүүнд нэрийг нь дэвшүүлж, Монгол Улсын Их Хуралд санал болгохоор тогтжээ.

Д.Гангабаатар нь гадаад хэлний дээд сургуулийг орчуулагч, МУИС-ийн Хууль зүйн сургуулийг эрх зүйч мэргэжлээр тус тус төгссөн. Япон улсын Нагояагийн их сургуулийн Хуулийн сургуульд хууль зүйн магистр, хууль зүйн ухааны докторын зэрэг хамгаалсан гадаадын таван хэлтэй нэгэн юм. 

Тэрбээр МУИС-ийн Хууль зүйн сургуульд захирлын туслах, багш, дэд профессор, эрдэмтэн нарийн бичгийн дарга, профессор, Нидерланд улсын Утрехтын их сургуулийн хуулийн сургуульд зочин судлаач, Их Британи улсын Queen’s University of Belfast зочин судлаач, АНУ-ын Жон Маршаллын хуулийн сургуульд зочин судлаач, Япон улсын Нагояагийн их сургуульд профессороор ажилласан байжээ.

Тэрбээр хуульд мэргэжлийг сонгосон талаар аав минь надад “Хуулийн мэдлэггүй хүн юунд захирагдаад, хаашаа хөтлөгдөөд байгаагаа олж харж чадахгүй. Миний хүү хуульч болохгүй юм гэхэд хуулийн мэдлэгтэй болоорой” гэж захиж байсан юм. Тэр үед би аавын хэлсэн үгийн ач холбогдлыг сайн ойлгоогүй ч хуулийн сургуульд элсэн суралцахаар шийдсэн нь оносон. Суралцаж эхэлсэн хойноо л дуртай болсон" хэмээсэн байдаг. 

Цэцийн гишүүнд түүнээс гадна УИХ-ын гишүүн асан З.Нарантуяа, Ж.Батзоригт, Б.Нармандах, А.Оюунчимэг нарын таван хүн материалаа ирүүлээд байснаас Дашбалбарын Гангабаатар нийт шүүгчийн хуралдаанаас олонхын санал авсан тул ийнхүү нэрийг дэвшүүлэхээр болсон байна.

Б.Баатар