УИХ-ын нөхөн сонгуульд нэр дэвшигчдийн хөрөнгө орлого олон нийтэд ил болоод буй. Тэгвэл эдгээрээс Сонгинохайрхан дүүргийн 28 дугаар тойрогт Ардчилсан намаас нэр дэвшигч, Хотын дарга асан Э.Бат-Үүлийн ХОМ олон нийтийн анхаарлыг ихээр татсан.

Тодруулбал, тэрбээр хөрөнгө орлогын мэдүүлэгтээ жилийн орлогоо нэг сая хоёр зуун мянган төгрөг, орон сууцгүй, 40 сая төгрөгөөр үнэлэгдэх Volkswagen Touareg автомашин нэг, 10 сая төгрөгөөр үнэлэгдэх таван адуу, нэг сая дөрвөн зуун мянгөн төгрөгийн хадгаламж, 34 сая төгрөгийн авлага, 20 сая төгрөгийн зээл, 10 сая төгрөгийн өв залгамжлалтай хэмээсэн байв. 

Түүнийг "Жилийн орлогоо нэг сая 200 мянган төгрөг гэж худал мэдүүллээ" гэх шүүмжлэл олон нийтийн дунд хөврөөд байсан юм. Харин тэрбээр энэ талаар тайлбар өгөв.

Нэр дэвшигч Э.Бат-Үүл "Миний сарын орлого нэг сая 200 мянга гэж бөглөснийг Сонгуулийн ерөнхий хороо санаатай жилийн орлого мэтээр тавьсан бололтой" хэмээжээ.  

Тиймээс энэ талаар СЕХ-ноос тодруулахад, "Нэгдүгээрт СЕХ хөрөнгө орлогын мэдүүлгийг хүлээн авах зохицуулалт байхгүй.

Хоёрдугаарт, хөрөнгө, орлогын мэдүүлгийг АТГ-аас өгсөн нууц, үг нэрээр тухайн хүн өөрөө нэвтэрч, цахимаар бөглөөд явуулдаг учраас өөрчлөх боломж байхгүй" гэх тайлбар өгсөн юм. 

Тэгэхээр нэр дэвшигч Э.Бат-Үүл өөрийн буруутай үйлдлээ СЕХ-руу хандуулах гэж оролдов уу, үнэхээр хэн нэгэн түүнийг харлуулах бодлого явуулсан уу ямартай ч түүний ХОМ асуудал дагуулж эхлэв. 

Б.Баатар