Гэр хорооллын дахин төлөвлөлтөд хамрагдсан ч газраа алдаж хохирсон иргэд мэдээлэл хийлээ. Тэдгээр иргэд Сонгинохайрхан дүүргийн нөхөн сонгуульд нэр дэвшиж байгаа Э.Бат-Үүл гэр хорооллын дахин төлөвлөлт нэрээр хүүтэйгээ нийлж, иргэдийг хохироочихоод хохирлыг барагдуулахгүй өнөөдрийг хүрсэн учир тэмцлийн хурц хэлбэрт шилжих болно гэдгээ мэдэгдэв.

Баянзүрх дүүргийн 12 дугаар хороонд газраа чөлөөлсөн иргэн "Манайх “Гранд Лайн” ХХК-д 2014 оны зургадугаар сарын 4-нд газраа чөлөөлж өгсөн. Үүнээс хойш долоон жилийн турш би настай ээж, хүүхдүүдтэйгээ орох оронгүй явна. Энэ асуудлыг даруйхан шийдэж өгөхгүй бол нөхөн сонгуульд нэр дэвшиж буй Э.Бат-Үүлийн сонгуулийн уулзалтад очиж өндөг шидэж эсэргүүцлээ илэрхийлнэ" гэв.

Мөн Баянзүрх дүүргийн 12 дугаар хорооны иргэн Отгонбаярын дүү "Гранд лайн" ХХК-тай 2013 онд гэрээ хийгээд газраа чөлөөлж өгсөн. Үүнээс хойш найман жилийн турш байр, хашаа байшин ч үгүй явна. Очоод амьдрах гэхээр байшингийн хоосон суурь л байна. Гурван шатны шүүхээр "Гранд Лайн" ХХК иргэнийг хохироосон гэдгийг 2020 онд тогтоосон. Гэтэл одоог хүртэл хохирол барагдуулаагүй энэ компанид маш их гомдолтой байна. Зөвхөн манайх биш Баянзүрх дүүргийн 12 дугаар хороонд гэр хорооллын дахин төлөвлөлтөөр газраа чөлөөлж өгсөн 48 өрх орох оронгүй байна" гэж ярилаа.

Сонгинохайрхан дүүргийн тавдугаар хорооны иргэн "Жи Ди" ХХК хохирогч энэ талаар "Э.Бат-Үүл түүний хүү Б.Чулуудай хоёр 800 гаруй айлын газрыг дахин төлөвлөлт нэрээр луйвардсан. Эдгээр айлуудаас 184 айл нь ямар ч орон гэргүй, 7-8 жил тэнэж явна. Ингэж гуйлгачин байдалтай байсаар зарим нэг нь нас барлаа. Гэтэл Э.Бат-Үүл иргэдийг доромжилж байгаа юм шиг Сонгинохайрхан дүүрэгт нэр дэвшинэ гээд явж байна. Үнэхээр нэр дэвших гээд байгаа юм бол иргэдийг хохиролгүй болгочихоод улс төр гэж ярих хэрэгтэй. Сонгинохайрхан дүүргийн иргэд өөрийг нь үнсэж угтана гэж яриад байсан. Энэ бол худлаа бид түүнийг үнсэж бус өндөгөөр угтах болно. Энэ асуудлыг шийдэж өгөхгүй бол суулт хийхээс өөр арга зам байхгүй" гэв.

Б.Баатар