Балбын хойд хэсэгт наймдугаар сарын 26-ны өглөө гэнэт хүчтэй үер бууж, олон арван хүн амиа алдан, олон зуун хүн сураггүй болоод байна. Үер Бхоте-Коши голын ус гэнэт нэмэгдсэнээс үүссэн бөгөөд Балба, Хятадын захиргаанд байдаг Төвдийн хил орчмын Расува, Нувакот зэрэг дүүрэгт хамгийн их хохирол учирчээ. Голын ус эрэг дагуух тосгон, зам, гүүр, барилга байгууламж, усан цахилгаан станцуудыг урсган сүйтгэсэн байна.
Анхны мэдээллээр үерийг мөс, чулууны нуранги голд унаснаас үүссэн гэж үзэж байсан. Гэвч дараагийн шинжилгээгээр үерийн гол шалтгаан нь асар том хөрсний гулгалт байсан байж болзошгүй нь тогтоогджээ. Эхэндээ үүнийг 4.4 магнитудын газар хөдлөлттэй холбоотой гэж мэдээлж байсан ч АНУ-ын Геологийн албаны дараагийн дүн шинжилгээгээр газар хөдлөлт болоогүй, харин хөрсний гулгалтаас үүссэн чичиргээ байж болзошгүй гэж үзсэн байна.
Үерийн ус маш богино хугацаанд асар их хүчтэйгээр урссан тул хүмүүс аврагдах боломж маш бага байсан аж. Reuters агентлагийн мэдээлснээр үерийн ус шавар, чулуу, нурангитай холилдон урсаж, замдаа таарсан бүхнийг хаман оджээ.
Олон зуун гадаадын иргэн сураггүй болов
Балбын аялал жуулчлалын байгууллагын мэдээллээр 384 аялагч сураггүй болсон бөгөөд үүнээс 291 нь гадаадын иргэн, 93 нь Балбын иргэн байжээ. Тэдний дунд Энэтхэг, АНУ, Их Британи, Малайз, Австрали зэрэг орны иргэд байгаа аж.
Үерийн улмаас олон тооны байшин, автомашин, гүүр, зам шавар, чулууны дор дарагджээ. Зарим газарт зам болон дэд бүтэц бүрэн тасарсан учир аврах ажиллагаа хүндрэлтэй байгаа юм. Балбын арми болон цагдаа нар нисдэг тэрэг ашиглан эрэн хайх, аврах ажиллагаа явуулж байна. Хил залгаа Төвдийн нутаг дэвсгэрт мөн их хэмжээний хохирол учирч, олон хүн сураггүй болсон байна.
Балбын Ерөнхий сайд Балендра Шах ард иргэдээ тайван байж, гамшгийн үед нэгдэн ажиллахыг уриалаад, засгийн газар аврах, эмнэлгийн тусламж, хоол хүнс, түр байрны асуудлыг бүрэн хариуцна гэж мэдэгджээ. Хохирлын тоо аврах ажиллагааны явцад хурдан өөрчлөгдөж байна. 8-р сарын 26-ны эхний мэдээллээр 8–22 хүн нас барсан гэж мэдээлж байсан бол өдрийн сүүлчээр 95, улмаар 160 орчим хүн амиа алдаад байна. Энэ тоо цаашид ч өснө.
