Монгол ардын нам засгийн эрх бариад жил гаруйн хугацаа өнгөрч байгаа ч албан тушаалын бялуу хуваалт нь үргэлжилсээр байна.

Хамгийн сүүлийн жишээ гэхэд “Эрдэнэс Оюу толгой” ХХК-ийн гүйцэтгэх захирлаар Байгаль орчин аялал жуулчлалын сайд асан Н.Цэрэнбатыг томилсон.

Н.Цэрэнбат нь МАН-ын гишүүн бөгөөд 2016 онд Увс аймгаас УИХ-д сонгогдон улмаар 2017 онд Байгаль орчин, аялал жуулчлалын сайдаар томилогдож байсан юм. Харин өнгөрөгч 2020 оны сонгуульд дээрх тойрогтоо дахин өрсөлдсөн боловч олны итгэлийг хүлээж чадалгүй унасан билээ. Гэсэн тэрбээр намынхаа буянгаар ийнхүү томоохон албан тушаалд залрав. 

Барилга хот байгуулалтын сайд асан Г.Мөнхбаяр ч албан тушаалын бялуу хуваалтаас хоцроогүй.

МАН-ын гишүүн түүнийг Монгол Улсаас Бүгд Найрамдах Турк Улсад суух Онц бөгөөд Бүрэн эрхт Элчин сайдаар томилж, өнгөрсөн есдүгээр сарын 15-ны өдөр итгэмжлэх жуух бичгийг нь гардуулан өгсөн. Г.Мөнхбаяр нь Улаанбаатар хотын Захирагчийн ажлын албаны дарга, НИТХ-ын дарга, Засаг дарга, Барилга хот байгуулалтын сайдаар ажиллаж байсан нэгэн юм. 

Эрх баригчдын сүүлийн үеийн томилгооноос "МИАТ” ТӨХК захирлын суудалд түр залраад буй Б.Мөнхтамирын томилгоо яах аргагүй олны анхаарлын төвд буй.

Тэрбээр тус газрын Захиргаа, хууль эрх зүй эрхэлсэн дэд захирлаар ажиллаж байсан бөгөөд МАН-ын дэргэдэх Нийгмийн ардчилал монголын залуучуудын холбооны Дэд Ерөнхийлөгчөөр ажилладаг. Энэ нь ч дээрх албан тушаалд очих томоохон шалгуур болсон гэгдэж байгаа. Нэлээд олон курс, сургалт төгссөн гэх намтартай түүнийг намынхан нь ийнхүү өөд татаж, МИАТ-ийн "босс"-оор томилов.

Энэ мэтээр МАН-ын албан тушаалын бялуу хуваалт үргэлжилсээр байх нь.

Б.Баатар