Эхлэл Брэндийн Hulan 21 plus гар утасны хамгийн багадаа 20 хувийг Монголдоо угсарч байгаа хэмээн сүр дуулиантай мэдэгдэл, лайв хийж байсан Ч.Батзаяа захирлын үг, үйлдэл ч олны эргэлзээг төрүүлж эхэллээ.

Тэрбээр "Гаалийн байгууллагаас болж олон зуун захиалагчид зориулагдсан гар утас үйлдвэрлэгдэх үйл ажиллагаа саатаж байна" хэмээн Гаалийн ерөнхий газрын үүдэнд өлсгөлөн зарлаж, хэдэн мянган дагагчдаа Гаалийн ерөнхий газрын байцаагчид руу бойкотлосон мессэж бичихийг уриалж байсан. Гэтэл түүний үг, үйлдэл бүр нь эргэлзээ дагуулах боллоо.

Тодотговол, Эхлэл Брэндийн Hulan 21 plus гар утсыг тойрсон дээрх дуулиан намжиж амжаагүй байтал дахин олны анхаарал татсан мэдээлэл ил боллоо. 

Эхлэл Брэндийн ажилтнууд 4000 гаруй хэрэглэхэд бэлэн болсон Hulan21 plus гар утсыг өмнөд хөршөөс оруулж ирэхдээ гаалийн байгууллагад 2-3 тусдаа сэлбэг гэж мэдүүлж, их хэмжээний татвар төлөхөөс зайлсхийсэн гэмт хэргийн шинжтэй зөрчил гаргасан байна. Тиймээс гаалийн байгууллагад зөрчлийн хэрэг нээж, холбогдох шалгалтын ажиллагаа явагдаж байгаа талаар эх сурвалж мэдээлэв.

Мөн эдгээр гар утсаа гаальд мэдүүлсэн анхны үнэ нь монголд зарагдаж байгаа Hulan21plus-ийн үнээс хэдэн арав дахин бага байгаа нь хэрэглэгчдийн эрх ашгийг ноцтой хохироож байж болзошгүй байгаа аж. Тиймээс Шударга өрсөлдөөн хэрэглэгчийн төлөө газар энэхүү үйлдлийг анхааралдаа авахыг олон нийт шаардаж байна.