Өнөөдөр олон улсын охидын эрхийг хамгаалах өдөр тохиож байна. Энэ өдрийг тохиолдуулан Монголын Эмэгтэйчүүдийн холбооноос "Бүжингийн суулт" Сүхбаатарын талбайд зохион байгуулж байна.

Тус холбооноос охидын эсрэг хүчирхийллийн ялын бодлогоо эргэж харах, насанд хүрээгүй хүүхдийг хүчирхийлсэн этгээдийн ялыг биеэр заавал эдлүүлэх, зүйл тус бүр дээр ял нэмэгдүүлэх, сэтгэл санааны хохирлыг нөхөн төлүүлдэг болох, ажлын байран дахь бэлгийн дарамтын зүйл заалтыг буцааж хүчинтөгөлдөр болгох зэрэг таван шаардлагыг Эрүүгийн хуульд оруулахыг УИХ-аас шаарджээ.

Монголын Эмэгтэйчүүдийн холбоононы ерөнхийлөгч Б.Оюунгэрэл "Өнөөдөр Төв талбайд 330 бүжингийн суулт болж байна. Бидний гаргасан таван санал 2019 оноос хойш өнөөдрийг хүртэл ажил хэрэг болж чадахгүй байгаа учраас биднийг авраач гэж аврал эрж байгаа юм.

Бэлгийн хүчирхийллийн хохирогч гэдэг бол насан туршийн дарамт болж байдаг.

Бие махбод, эдийн засаг, сэтгэл санаагаараа хохирдог. Энэ төрлийн гэмт хэрэг үйлдэж байгаа этгээдүүдийн 85 хувь нь ойр дотнын хүмүүс байдаг гэсэн статистик байдаг.

2017 онд 139 орчим хүүхэд бэлгийн хүчирхийллийн хохирогч болсон судалгаа байдаг бол 2020 онд энэ тоо гурав дахин өссөн.

Энэ бол зөвхөн бүртгэгдсэн тоо. Үүний ард чимээгүй хаалганы цаана олон гэмт хэрэг чимээгүй гэмт хэрэг үйлдэгдэж байна. Одоо хүчинтөгөлдөр мөрдөгдөж байгаа хуулиар 0-13 насны хүүхдийг хүчирхийлбэл 12-20 жил, 14-18 насны хүүхдийг хүчирхийлбэл 5-8 жилийн ялын санкцтай байдаг. Гэвч бага насны хүүхдийн эсрэг бэлгийн хүчирхийлэл үйлдсэн этгээдэд 20 жилийн ял өгсөн жишээ байдаггүй. Учир нь гэмт хэрэг үйлдсэн этгээд болон хохирогчийн төлөөлөгч н гэр бүлийн этгээд байдагтай холбоотой. Энэ нь томчуудад ял завших боломж олгож байгаа учраас ялын доод хэмжээг дээшлүүлэх саналтай байгаагаа УИХ-д уламжилсан" гэлээ.

А.Сүх