Аврал эрсэн "Гоожингийн өндөр" хэмээх түүхэн дурсгалт газар, одоо багачуулын эмээдэг газар "балгас" ч гэж хэлж болохоор уг байшин засвар авч чадахгүй эцэстээ ойр хавийн оршин суугчдын авто зогсоол болоод дуусах уу. Уг нь 2012 оны арванхоёсрдугаар сард тухайн  үеийн засаг дарга Сү.Батболд сэргээн засварлах, Нийслэлийн өмчид авах захирамж гаргажээ. Уг ажлыг дараа оны наймдугаар сарын 1 гэхэд сэргээн засварлаж дуусгахыг даалгасан ч одоог хүртэл тордох "эзэн"-гүй, түүний захирамж ажил хэрэг болж чадаагүй явна. 

Үүгээр сайд, дарга нарын ямар ч уялдаа, холбоогүй ажилладийг харж болно. 

Уг байшинг яагаад сэргээн засварлах, хойч үедээ "сэхээрүүлэн" үлдээх ёстойг доор дурдая.

"Гоожингийн өндөр" хэмээх байшинг анх 1914 онд Богд хааны Өндгөн сүргийн нутагт, одоогийн Төв цэнгэлдэх хүрээлэнгийн зүүн хойд хэсэгт Богд хаант Монгол улсын Ерөнхий сайд, Сайн ноён хан Намнансүрэнд зориулан барьжээ.

дараа нь Манжийн засаг захиргаа төвлөрч, хятадын гамин цэргийн штаб /Сийлэнпүүгийн яам/ байрлаж байсан үед олноо өргөгдсөн оны үед байшин Сангийн яамны мэдэлд очиж, Сангийн яамны сургагч С.А.Козин ажиллаж амьдрах болжээ. 

Тэр үед аливаа хоёр давхар байшинг “өндөр” гэж хүрээнийхэн нэрийддэг, мөн Козин хэмээх нэрийг дуудахад бэрх тул “Гоожин” хэмээн сунжруулан дуудах болсноор “Гоожингийн өндөр” хэмээх нэршил бий болсон аж. Энэ байшингийн нэг тасалгаанд Монголын хууль шастир хэвлэх газар байрлаж, тэнд 1919 онд Д.Сүхбаатар үсэг өрөгчөөр ажиллаж байжээ.