“Улаанбаатар Элит” олон улсын дунд сургууль “Elite International MUN” буюу НҮБ-ын загвар хурлыг сурагчдын дунд зургаа дахь жилдээ зохион байгуулж байна. Энэ жилийн хурал аравдугаар сарын 25-27-нд “Тодорхой бус ирээдүй” сэдвийн хүрээнд англи, монгол, орос, хятад хэлээр зохион байгуулагдсан юм. Хүн төрөлхтөн Ковид19 цар тахлын буулганд амьдарч буй энэ цаг үед ирээдүйн талаар яг таг тодорхой зүйл үнэндээ алга. Тиймээс “Elite International MUN”-ээр цар тахлын дараахь тодорхой бус ирээдүйн талаар хэлэлцэж байгаа аж.

Уг үйл ажиллагааг сурагчид өөрсдөө зохион байгуулдаг бөгөөд УОК-ын зөвшөөрлийн дагуу, коронавирусийн эсрэг халдвар хамгааллын дэглэмийг сахин явуулж байгаагаараа онцлогтой.

“Elite International MUN” НҮБ-ын загвар хурал НҮБ-ын үйл ажиллагааг сурагчдад таниулах, сурагчдын нийгмийн идэвхийг нэмэгдүүлэх, хэлний мэдлэгийг сайжруулах, өөрийгөө илэрхийлэх, багаар ажиллах, бичих, илтгэх чадварыг сайжруулах зэрэг олон талын ач холбогдолтой юм. Яг л НҮБ-ын хурлын дэг журам, салбар хороод зэргээр хуваагдаж хүүхдүүд дэлхий нийтэд тулгамдаж буй сэдвийг хэлэлцэж байгаа юм.

Энэ жилийн загвар хуралд 50 сургуулийн 400 гаруй хүүхэд бүртгүүлснээс 160 сурагч шалгарчээ. Тухайлбал, Улаанбаатар хотоос гадна Баян-Өлгий, Орхон, Дархан-Уул аймгаас 20 сурагч оролцож байгаа бол гадаадын харьяат 10 сурагч оролцож байна.

Хуралд оролцогч, зохион байгуулагч сурагчдын сэтгэгдлийг сонслоо.

“Улаанбаатар Элит” сургуулийн сурагч, хурлын ерөнхий зохицуулагч Д.Агиймаа:

-Бид энэхүү арга хэмжээг зохион байгуулахдаа УОК-оос зөвшөөрөл авсан. Энэ жил коронавирусийн халдварын нөхцөл байдлаас шалтгаалаад илүү өндөр түвшний хяналт тавьж, урьдчилан сэргийлэх арга хэмжээ авч ажиллаж байна. Тухайлбал, хүүхдүүдийг хүлээж авахдаа халууныг нь тогтмол хэмжиж, амны хаалтаа зүүх, гараа ариутгах шаардлага тавьж, түргэвчилсэн шинжилгээ авч байна. Мөн хуралдааны завсарлагааг зөрүүлж, аль болох бөөгнөрөл үүсгэхгүй байхаар тооцож байгаа юм.

“Эрэл” сургуулийн 12 дугаар ангийн сурагч Б.Бат-Энх:

-Би өмнө жилүүдэд НҮБ-ын загвар хуралд оролцож байсан. Энэ жил Аюулгүйн хороонд Америкийн нэгдсэн улсыг төлөөлж байна. Бид Афганистанд үүсээд буй нөхцөл байдлын талаар хэлэлцэж байгаа юм. Тухайлбал Талибаныг Афганистаны төр гэж хүлээн зөвшөөрөх эсэх, дүрвэгсдийг хэрхэх талаар шийдвэр гаргаж байгаа юм.

“Elite International MUN”-ий хамгийн гол давуу тал нь ижил сонирхолтой шинэ хүмүүстэй танилцах, олон найзтай болох явдал байдаг.

“Улаанбаатар элит” сургуулийн 10 дугаар ангийн сурагч Алия Адилбаева:

-Би Казахстан улсын иргэн. Түрүү жил хорооны төлөөлөгчөөр ажиллаж байсан бол энэ жил анх удаа Хурлын зөвлөх даргаар ажиллаж байна. “Elite International MUN” загвар хуралд оролцсоноор харилцааны чадвар, багаар ажиллах чадварт суралцдаг. Түүнчлэн дэлхийн том асуудалд дүн шинжилгээ хийж, шинэ санаа гаргаж, шийдвэр гаргадаг учраас мэдлэгээ тэлж чаддаг. Хэд хэдэн удаа оролцсон туршлагатай хүүхдүүд анхан шатнаас эхлээд олон асуудлын шийдлийг хайдаг учраас жил бүр өсөж, хөгжсөөр байдаг.

Баян-Өлгий аймгийн “Даран” сургуулийн 11 дүгээр ангийн сурагч Б.Арайлым:

-Би Баян-Өлгий аймгаас долоо хоногийн өмнө ирсэн. Энэ жил анх удаа загвар хуралд оролцож байгаадаа сэтгэгдэл маш өндөр байна. Учир нь загвар хуралд оролцсоноор үеийн найзуудаасаа маш олон зүйлийг сурч байна. Түүнчлэн өөрийнхөө ярих, илтгэх чадвартаа үнэлэлт, дүгнэлт хийлээ. Олон талын мэдлэг туршлага хуримтлууллаа.

Ийнхүү гурван өдрийн турш үргэлжилсэн “Elite International MUN” НҮБ-ын загвар хурал амжилттай болж өнгөрлөө. “Цар тахлын дараахь “Тодорхой бус ирээдүй” гэдэг яах аргагүй бидэнд хамаатай сэдэв учраас сурагчид боловсрол, залуусын оролцоо зэрэг бүхий л сэдвээр санал бодлоо хэллээ” хэмээн оролцсон сурагчид ярьж байна.

Мөн “Улаанбаатар Элит” олон улсын дунд сургуулийнхан уламжлал болгон зохион байгуулдаг “Elite International MUN” НҮБ-ын загвар хурлын хийчихээд дараагийн үеийнхэндээ хандаж анхаарах зүйлсийн талаар захидал үлдээдэг юм байна. Энэ нь өөрөө загвар хурал жил ирэх тусам сайжирч, чанаржих үндэс болдог гэж ярьж байлаа.