Засгийн газрын өргөн барьсан ирэх оны Төсвийн тухай хуулийн төслийн гуравдахь хэлэлцүүлгийг УИХ энэ долоо хоногт хийж байгаа. Энэ төслөөр бол Засгийн газрын бүтэц, бүрэлдэхүүнд өөрчлөлт орох нь тодорхой байгаа. Өөрөөр хэлбэл, ирэх оны нэгдүгээр сарын 1-нээс Засгийн газрын бүтцэд хоёр яам, бүрэлдэхүүнд хоёр сайд нэмэгдэхээр байгаа юм. Үүнтэй зэрэгцээд Засгийн газар дэд сайд нарын бүрэлдэхүүндээ өөрчлөлт оруулахаар яриад эхэлжээ.

Одоогийн ярилцаж байгаа хувилбараар бол гурван дэд сайдыг сэлгэж, гурван дэд сайдыг өөр ажилд томилж, хоёр дэд сайдад хариуцлага тооцох бололтой. Сэлгэх гурван дэд сайд нь Зам тээвэр, хөгжлийн дэд сайд Ж.Бат-Эрдэнэ, Эрчим хүчний дэд сайд М.Баярмагнай, Барилга, хот байгуулалтын дэд сайд Э.Золбоо нар юм байна. Энэ гурван дэд сайдын хувьд УИХ-ын ирэх сонгуулиар МАН-аас нэр дэвших магадлалтай хүмүүс.

Тиймээс өөрсдийнх нь нэр дэвших тойрогт аль салбар нь илүү танигдаж болохоор байгааг нь харгалзаж сэлгэх бололтой. Ж.Бат-Эрдэнэ дэд сайдын хувьд Сүхбаатар аймгийн МАН-ын хороог тэргүүлж байгаа, ирэх сонгуульд тус аймгаас нэр дэвшихээр тойргоо услаад эхэлсэн. Харин УИХ-ын дарга Г.Занданшатарын хүн гэгддэг М.Баярмагнай нь Баянхонгор аймгаас нэр дэвшихээр горилж буй. Э.Золбоогийн хувьд аавынхаа нутаг Хөвсгөл аймгийг услахаар зэхжээ.

Харин өөр ажилд томилох замаар дэд сайдаас нь чөлөөлөхөөр яригдаж байгаа гурав нь Боловсрол, шинжлэх ухааны дэд сайд Г.Ганбаяр, Сангийн дэд сайд С.Мөнгөнчимэг, Байгаль орчин, аялал жуулчлалын дэд сайд Ц.Батбаяр нар юм байна. Эдгээр дэд сайд нь хоёроос гурван Засгийн газарт дэд сайдаар ажилласан хүмүүс юм. С.Мөнгөнчимэгийн хувьд 2016 оноос Нийгмийн хамгаалал, хөдөлмөрийн дэд сайдаар, 2020 оноос Сангийн дэд сайдаар ажиллаж байгаа бол, Г.Ганбаяр нь 2018 оноос Боловсрол, шинжлэх ухааны дэд сайдаар ажиллаж байгаа билээ. Хамгийн удаан дэд сайдаар ажилласан гурвыгаа Засгийн газар өөр ажилд томилж, дэд сайдаас чөлөөлөх ийм хувилбар яригдаж байна.

Мөн хариуцлага алдсан үндэслэлээр хоёр дэд сайдыг чөлөөлж магадгүй байгаа нь Гадаад харилцааны дэд сайд Б.Мөнхжин, Эрүүл мэндийн дэд сайд М.Баттүвшин нар ажээ.

Б.Жаргал