УИХ-ын Эдийн засгийн байнгын хорооны энэ өдөр /2021.11.03/-ийн хуралдаанаар Монголбанкаас 2021 оны 9 дүгээр сарын 27-ны өдөр ирүүлсэн “Төрөөс мөнгөний бодлогын талаар 2022 онд баримтлах үндсэн чиглэл батлах тухай” Улсын Их Хурлын тогтоолын төслийн анхны хэлэлцүүлгийг хийлээ. Энэ үеэр УИХ-ын гишүүн Н.Ганибал 10 их наядын хөтөлбөрөөс хэдэн хувийг нь инфляцийг тогтворжуулах болон экспортыг нэмэгдүүлэхэд чиглүүлж зарцуулсан талаар мэдээлэл хүслээ. Тэрээр цааш нь хэлэхдээ “Инфляци Улаанбаатарт 9.9, улсын хэмжээнд 9.6 хувьд хүрч, цаашид өсөх хандлагатай байна. Бид зөвхөн ЗГ-т чиглэл өгөөд, асуудлаас зайлхийж болохгүй.  Монгол банкинд бас асуудал байна. 2021 оны 9-р сарын эцсээр 27 их наяд төгрөгийн бэлэн мөнгөний нийлүүлэлт хийсэн. Энэ нь өмнөх оны мөн үеэс 4,6 их наяд буюу 20,4 хувиар огцом өссөн үзүүлэлт. Энэ нь инфляцид нөлөөлсөн эсэх талаар тодорхой мэдээлэл хэрэгтэй байна. Мах, махан бүтээгдэхүүний үнийг чөлөөлөөд өгвөл олон улсын болон дотоодын зах зээл дэх үнийн зөрүү багасна. Энэ үнийн зөрүүгээс махны үнэ ихээр савладаг. Иймд эхлээд үнийг чөлөөлөөд, олон улсын зах зээлийн бодит үнийг тогтоогоод авбал өргөн хэрэглээний бараа бүтээгдэхүүнүүдийн инфляцид нөлөөлөх нөлөөлөл багасна хэмээн байр сууриа илэрхийллээ. 

Б.Жаргал