МАН-ын 30 дугаар их хурал болж байна. Энэ үеэр Монгол Улсын Ерөнхийлөгчийн Тамгын газрын дарга Я.Содбаатар Монгол Улсын Ерөнхийлөгч У.Хүрэлсүхийн мэндчилгээг хүргэлээ. “Эрхэм хүндэт Их хурлын төлөөлөгч, журмын нөхөд өө. Эх орныхоо өнцөг булан бүрээс намын олон түмнээ төлөөлөн ирсэн МАН-ын эрх барих дээд байгууллага, Их хурлын бүрэн эрхт төлөөлөгч та бүхэнд чин сэтгэлийн халуун мэндчилгээг дэвшүүлж, Их хурлын үйл ажиллагаанд амжилт хүсье.
Төв азийн цээжинд байгуулагдсан анхны улстөрийн хүчин, МАН-ыг үүсгэн байгуулж, тэмцэл ялалтын түүхийг бүтээж, улс орныхоо тусгаар тогтнол аюулгүй байдлын төлөө алтан амь, бүлээн цусаа өргөсөн эх орончид улс орныхоо хөгжил дэвшил бүтээн байгуулалтын төлөө амьдрал, залуу, халуун насаа, хөлс хүчээ зориулсан өвөг дээдэс, ахмадын үеийнхээ алдар гавьяагаар бахархан дурсаж, олон намын тогтолцоотой өнөө үед улстөрийн идэвхитэй байр суурь баримтлан улс орныхоо язгуур эрх ашиг, үндэсний аюулгүй байдлыг сахин хамгаалах, ардчилал, хүний эрхийг дээдлэх, үзэл санаа, үнэт зүйлийнхээ төлөө зүтгэж буй Ардын намын нийт гишүүд дэмжигчдэд МАН-ын түүхт 100 жилийн ой, Ардын хувьсгалын 100 жил, Монгол Улс НҮБ-д Бүрэн эрхт гишүүнээр элсэн орсны 60 жилийн ойн баярын мэндийг хүргэж, сайн сайхан бүхнийг хүсэн ерөөе. Их хурлын төлөөлөгчид өө.
Бид бидний өвөг дээдэс тусгаар тогтнолоо тунхаглан Бүгд найрамдах улсаа байгуулж, эх орноо дэлхий ертөнцөд хүлээн зөвшөөрүүлж, НҮБ-ын Бүрэн эрхт гишүүн болж, төр улсаа сэргээн бадраасан агуу их үйл хэрэг нь хэзээ ч мартаж үл болох түүхэн гавьяа юм. 100 жилийн өмнөх Тангаргын гэрээнээс Шинэ ардчилсан үндсэн хуулийг батлан хэрэгжүүлсэн нэгэн зууны товчоолон дүгнэвээс МАН нь Ардын эрхт, Бүгд найрамдах Үндсэн хуульт төр засгаа эмхлэн байгуулж, улс орныхоо тусгаар тогтнол, үндэсний аюулгүй байдал, хөгжил дэвшлийн төлөө бүтэн зууны турш тэмцэн зүтгэж ирсэн шинэ зууныг өртөөлөн угтаж буй улстөрийн ууган хүчин болохыг илтгэн харуулж байна.
Энэ их тэмцлийн хүчинд Монголын хүн ам өсөж, эрдэм боловсролтой, эрүүл чийрэг болж, зуун зууны хоцрогдлыг түүх болгон үлдээж, соёл боловсрол, сонгодог урлагийг хөгжүүлж, Монгол хүн сансарт нисэж, дэлхийн хөгжлийн хурдтай хөл нийлүүлэн алхаж, орчин үеийн сайхан монгол орон минь хөгжин мандсан түүхтэй” хэмээн хэлсэн үгнээс нь онцоллоо.
