“Эрдэнэт” үйлдвэр 240 сая ам.долларын зээл авсан асуудлаар “Эрдэнэт” үйлдвэрийн захирал Х.Бадамсүрэн тайлбар хийлээ. Тэрбээр “Өнгөрсөн зун “Эрдэнэт” үйлдвэрийг баатар үйлдвэр болгосон. Энэ нэр төрийг хадгалж авч үлдэхийн төлөө манай хамт олон өдөр, шөнөгүй зүтгэж байгаа. Ийм байхад буруу ташаа мэдээллийг чухам ямар хүний захиалгаар хэвлэл мэдээллээр явуулаад буйг уурхайчин бид ойлгохгүй байгаа. Энэ талаар манай холбогдох хүмүүс тухай бүрт нь хариу өгсөн, тайлбар хийсэн. “Эрдэнэт” үйлдвэрийн үйл ажиллагаа хэвийн жигд явж байгаа. Төсвийн өмнө хуулиар хүлээсэн үүргээ бүрэн дүүрэн биелүүлж байгаа. Цаашид зэсийн хайрлуулах, боловсруулахаас авахуулаад том төсөл хэрэгжүүлэхээр төлөвлөж байгаа. Үүнтэй холбогдуулан зээл авах, гадаад дотоодын хөрөнгө оруулагч нартай хамтарч ажиллах шаардлага гарна. Энэ том төсөл. Хэвлэлээр яваад байгаа шиг “Эрдэнэт” үйлдвэрийн дансанд гэнэт мөнгө орсон асуудал огт байхгүй. Харин хил, гаальтай холбоотой асуудал байгаа. Импортоор авч байгаа барааны асуудал бол бидэнтэй тендрээс шалгарч, гэрээ байгуулаад ажиллаж байгаа компаниудын хувьд хүндрэл гарсан асуудал бий. Харин экспортын хувьд зэсийн баяжмалыг чингэлэгт ачуулах асуудал яригдсан. Энэ нь хүндрэл учруулж болзошгүй. "Эрдэнэт" үйлдвэрийн бүх ажил хуулийн хүрээнд явж байгаа. Үүнд хэвлэл мэдээллийнхэн эргэлзэх зүйлгүй. Монгол ард түмэн ч эргэлзэх юмгүй. Би үүнийг Ерөнхий захирлын хувьд хариуцлагатайгаар мэдэгдье.    

Б.Жаргал