БНХАУ-д ажлын айлчлал хийж байгаа Монгол Улсын Ерөнхий сайд уржигдар буюу хоёрдугаар сарын 6-нд БНХАУ-ын дарга Ши Жиньпинд бараалхсан. Уулзалтын үеэр Монгол Улсын Ерөнхий сайд Л.Оюун-Эрдэнэ “Олимп бол хүн төрөлхтний энх тайван эв нэгдлийн бэлэг тэмдэг, биеийн тамир спортыг улс төржүүлэхийг Монгол Улс эрс эсэргүүцнэ. Монгол Улсын цар тахал хамгийн хүнд үед вакцинаар тусламж үзүүлсэн Хятад улсад чин сэтгэлийн талархал илэрхийлж байна. 

Сайн хөршөө алтаар ч солихгүй. Хятад улс бол Монгол Улсын алтаар ч солихгүй сайн хөрш.

Хятадын хөгжил Азийн үнийн тухай үзэлт соёлыг дэлхий нийтээрээ чухалчлах болгосон байна. Хятадын хөгжлийн хурдны тэргэнд сууж, Хятадын талтай хамтын ажиллагаагаа гүнзгийрүүлэхэд Монгол Улс бэлэн байна. Монгол Улсын шинэ хөгжлийн бодлогыг “Бүс ба Зам” санаачилга, Хятад улсын 14 дүгээр таван жилийн төлөвлөгөөтэй уялдуулж, Монгол Хятадын иж бүрэн стратегийн түншлэлийн харилцааг шинэ түвшинд гарган, Монгол Хятадын харилцааг хөрш орнуудын солилцоо, олон улсын харилцааны үлгэр жишээ болгоход Монголын тал бэлэн байна гэжээ.” Ерөнхий сайдын “Алтаар ч солихгүй сайн хөрш” гэсэн үг нь өчигдөр олон нийтийн дунд маргааны нэгэн сэдэв болоод байв.

Ерөнхий сайдын энэ үг нь Хятадын зүйр үг бөгөөд БНХАУ-ын дарга Ши Жиньпин 2014 онд манай улсад айлчлахдаа энэ үгийг мөн хэлж байв. Ши Жиньпин дарга тэр айлчлалынхаа үеэр “Миний нутаг” шүлгийг УИХ-ын танхимд Монголоор уншиж, олон сайхан зүйр үгээс эш татаж байлаа. Хүндэтгэлийн чуулган дээр хэлсэн үгэндээ БНХАУ-ын дарга Ши Жиньпин “Хүлгийн сайныг унаж мэддэг, хүний сайныг ханилж мэддэг”, “Усны дэргэдэх асраас сарны тусгалыг түрүүлж харна”, “Замаа мэдвэл явахад амар, хүнээ мэдвэл ярилцахад амар”, “Айл хүний амь нэг, саахалт хүний санаа нэг”, “Сайн хөршийг алтаар ч солихгүй” гэсэн Монгол, Хятадын зүйр үгүүдийг шигтгэж байв.

С.Сүлд