Засгийн газрын хуралдаанаар хэлэлцсэн асуудлын талаар Барилга, хот байгуулалтын сайд Б.Мөнхбаатар мэдээлэл хийлээ. Тэрбээр "Улсын төсвийн бус эх үүсвэртэй, төсөл арга хэмжээний давхцлаас шалтгаалан 31 төсөл арга хэмжээ хасагдаж, 2022 оны тавдугаар сарын 12-ны өдрийн байдлаар 1,222 төсөл арга хэмжээний жагсаалтыг эцэслэсэн. Энэ хүрээнд 524 төсөл арга хэмжээнд магадлал хийсэн бөгөөд 327 төсөл арга хэмжээ магадлал ирүүлээгүй. Гадаа зогсож байгаа барилгачдын зовлонг ойлгож байна. Магадлалаа зургадугаар сарын 15-нд дуусгана гэхэд зарим хүмүүс магадлал битгий хийлгээрэй гэж байсан. Дээрх 524 төсөлд магадлал хийхэд 269.1 тэрбум төгрөгийг зөрүү гарч байна. Үүнийг Засгийн газарт танилцуулж, УИХ-д өргөн барина.
Төр, хувийн хэвшилд асуудал хэн хэнд нь байгаа. Хөнжлийнхөө хэрээр хөлөө жийе. 270 гаруй тэрбум төгрөгийг 524 төсөл дээр тооцсон. Энэ үнийн өсөлт дотор тээврийн зардал багтсан байгаа.
“Сант-Өндөр” компанийн үнийн өсөлт 460 сая төгрөг, “Цагаан Булбай” компанийн үнийн өсөлт 554 сая төгрөг, “Зост трэйд” компанийн үнийн өсөлт 186 сая төгрөг, “Навтгар хайрхан” компанийн үнийн өсөлт 1 тэрбум 69 төгрөгөөр тус тус өсч байна. Барилгачдынхаа асуудлыг ойлгож байна.
Цементийн үнэ сүүлийн хоёр жил өсөөгүй. Дотоодын үйлдвэрлэлийг тавхан хувиар өсгөж ажиллаж байсан. Цементийн үнэд тоног төхөөрөмжийн элэгдэл нөлөөлж байгаа. Томоохон үйлдвэрүүд тулгамдаж буй асуудлаа ярьж байна. Жишээлбэл, МАК буталбарын үйлдвэрийн тоног төхөөрөмжөө оруулж чадахгүй Эрээн дээр гацсан асуудал байсан. Цементийн үйлдвэрлэгч нартай уулзаж үнийг барих асуудлыг ярьсан ч тээвэрлэлтийн асуудал саад болж байна" гэв.
