ОХУ-ын Гадаад хэргийн сайд С.Лавров Монгол улсад хийх ажлын айлчлалаа эхлүүллээ. Айлчлалын үеэр Монгол Улсын Гадаад хэргийн сайд Б.Батцэцэгтэй уулзаж санал солилцсон бөгөөд энэ талаар Гадаад харилцааны сайд Б.Батцэцэг мэдээлэл өглөө.

Тэрбээр "Энэ жил Монгол-ОХУ-ын хамтын ажиллагааны шинэ зууныг эхлүүлж байна. Манай хоёр улс цар тахлын хүндрэлийг хамтран даван туулж байгаад баяртай байна. Хамтын ажиллагааг иж бүрэн стратегийн түвшний үзэл санааны дагуу хоёр талын хүчин чармайлттайгаар урагшлуулах талаар ОХУ-ын Гадаад хэргийн сайд С.Лавровтой санал солилцлоо. Бидний харилцаа цар тахлын өмнөх байдалд эргэн орж төмөр зам, агаарын харилцааг сэргэснээр иргэдийн харилцан зорчих урсгал болон худалдааны хэмжээ мэдэгдэхүйц нэмэгдэж байна. С.Лавров сайдтай хийсэн хэлэлцээний үеэр өнгөрсөн жил хэрэгжсэн Монгол Улсын Ерөнхийлөгч У.Хүрэлсүхий н ОХУ-д хийсэн айлчлалын үеэр тохиролцсон ажлуудын хэрэгжилтийг ярилцаж харилцааны өнөөгийн байдлыг дүгнэж цаашдын хамтын ажиллагаа өндөр дээд түвшний айлчлалууд болон томоохон арга хэмжээ, төслүүдийн талаар санал солилцлоо. Түүнчлэн шийдлээ хүлээж буй олон жил болсон зарим асуудлын талаар ярилцаж цаашид хэрэгжүүлэх арга хэмжээний талаарх төлөвийг тодорхойллоо. Монгол Оросын харилцан итгэлцлийг улам бэхжүүлэх сонирхлоо хоёр тал нотолсон. Энэ хүрээнд худалдаа, эдийн засгийн хамтын ажиллагааг эрчимжүүлэх, тэнцвэржүүлэх, хамтарсан төслүүдийн явцыг урагшлуулах, хоёр талын байгуулсан баримт бичгийн хэрэгжилтэд анхаарах тал дээр санал нээж ярилцлаа. Манай хоёр улсын худалдааны хэмжээ 2021 онд хоёр тэрбум ам.доллар давсан. Энэхүү үзүүлэлтийг улам сайжруулах бүрэн боломжтой гэж үзлээ.

Алтанбулаг, Цагааннуур чөлөөт бүсүүдэд Оросын талаас хөрөнгө оруулах, хамтарсан үйлдвэрүүд байгуулах, тээвэр логистикийн төвүүдийг бий болгоход Оросын талтай хамтран ажиллах сонирхолтой бөгөөд Оросын хилийн боомтуудыг шинэчлэн өргөжүүлэх, ачаа тээвэрлэлтийн иргэдийн урсгалыг нэмэгдүүлэх чиглэлээр анхаарал хандуулахаар тохирлоо.

С.Лавров сайдтай хоёр улсын хэрэгжүүлж байгаа хамтарсан төслүүдийн талаар санал солилцлоо. БНМАУ, ОХУ, БНХАУ-ын эдийн засгийн коридор байгуулах хөтөлбөрийн хүрээнд хэрэгжүүлж байгаа ОХУ-аас БНХАУ-руу байгалийн хий нийлүүлэх хоолойг Монгол Улсын нутаг дэвсгэрээр дамжуулан барих төслийн ажлуудын хүрээнд хуваарийн дагуу хэвийн явагдаж байна. Мөн төмөр замаар манай улсын зүүн болон баруун хэсгээр хоёр хөрштэй холбогдох коридорын асуудлыг ярилцлаа" гэв. 

Т.Мөнхжаргал