Монгол Улсаас Их Британид суугаа элчин сайдын яам "The Hu" хамтлагтай хамтран тус хамтлагийн “Аянгын нүргээн” нэртэй цомгийг танилцуулах арга хэмжээг 2022 оны 12 дугаар сарын 08-ний өдөр Лондон хотноо ЭСЯ-нд зохион байгуулав. Тус хамтлаг 2022 оны 11 дүгээр сарын 28-наас 12 дугаар сарын 07-ны өдрүүдэд Ирландын Даблин, Британийн Манчестер, Лидс, Ноттинхам, Кардиф, Бирмингем, Белфаст, Глазгоу хотод тоглолтоо хийсэн юм.
Уг хамтлаг 2019 онд Монгол Улсын төрийн дээд шагнал “Чингис хаан” одонгоор шагнагдсан. Мөн НҮБ-ын Боловсрол, шинжлэх ухаан, соёлын байгууллага ЮНЕСКО “Хү” хамтлагийг 2022 оны 11 дүгээр сард Энх тайвны төлөөх уран бүтээлчээр (Artist for Peace) томилсноор энэхүү эрхэм хүндтэй үүргийг хүлээсэн анхны рок хамтлаг болсон билээ.
"The Hu" хамтлаг 2019 онд Британи болон Европын орнуудад аялан тоглолт хийж, “Гэрэг” нэртэй анхны цомгоо танилцуулж байсан бол энэ жилийн аялан тоглолтын хаалтын тоглолтыг Лондон хотын "Раунд хаус" концертын танхимд 12 дугаар сарын 09-ний өдөр хийсэн байна.
Л.Сайнаа
