УОК-оос цаг агаарын урьдчилсан мэдээ, халдварт өвчин, үер усны гамшгийн нөхцөл байдлын талаар мэдээлэл өглөө.

Тус үеэр УОК-ын нарийн бичгийн дарга Т.Баярхүү, “Долдугаар сарын 1-нээс эхлэн үргэлжлэн орсон бороо болон түр зуурын аадар борооны улмаас онцгой байдлын байгууллагад нийслэлийн 9 дүүрэг, 13 аймаг, 18 суманд голын ус эргээсээ хальж, үерлэсэн дуудлага мэдээнүүд бүртгэгдсэн. Энэ үеэр орон сууцнууд, айлын гэр, хашаа байшин, албан байгууллага, аж ахуй нэгжүүдийн барилга, машин, гэр гэх мэт эд хөрөнгүүд үерт өртөж хохирсон.

Мөн улсын чанартай болон орон нутгийн чанартай авто замууд, Улаанбаатар - Замын-Үүд чиглэлийн төмөр замууд үерийн улмаас эвдэрч, гэмтэл гарсан. Цахилгаан, эрчим хүч, дэд бүтцийн чиглэлийн гэмтлүүд учирсан. Үүнийг холбогдох байгууллагууд тухай тухайн үед сэргээн засах чиглэлийн арга хэмжээнүүд авч ажилласан.

Энэ хүрээнд долдугаар сарын 26-ны өдөр УОК-оос Засгийн газарт холбогдох зарим асуудлуудыг танилцуулсан. Баян-Өлгий аймаг, Сэлэнгэ аймгийн Мандал суманд эвдэрсэн гүүрийг сэргээн засварлах шаардлагатай хөрөнгийн эх үүсвэрийг Засгийн газрын нөөц сангаас гаргахаар шийдвэрлэсэн. Экспортын гол чиглэл болох Гашуунсухайтын боомтод бас үерийн нөхцөл байдал үүссэнтэй холбоотой нүүрсний авто зам болон холбогдох төрийн байгууллагуудын дэд бүтцэд учирсан гэмтлийг сэргээн засах чиглэлийн хөрөнгийг Засгийн газраас гаргахаар шийдвэрлэсэн.

Нийслэл хотод үргэлжлэн орсон борооны улмаас үерийн далан дагуу барьсан аж ахуй нэгж, айл өрхүүдийг сэргээн засварлах ажил үргэлжлэн явагдаж байна. Энэ хүрээнд холбогдох үнэлгээ хууль журмын дагуу хийгдээд УОК-т танилцуулсны дараа холбогдох хохирлын үнэлгээг авч хэлэлцэх ийм асуудал явагдаж байна. Иргэд бас гамшгийн эрсдлийн даатгалд хамрагдах шаардлагатай. Ингэснээр эрсдэлд өртсөн үед хохирлоо тодорхойлуулж нөхөн төлүүлэх боломжтой.

Түүнчлэн Онцгой байдлын байгууллагуудаас иргэдийн аюулгүй байдлыг хангах, үер усны ослоос урьдчилан сэргийлэх чиглэлээр шат дараатай арга хэмжээнүүдийг авч хэрэгжүүлж байгаа. Голын дагуу амарч зугаалж байгаа иргэдэд сэрэмжлүүлэг мэдээ түгээх, завьт эргүүл, хөдөлгөөнт эргүүл ажиллаж, хэвлэл мэдээллийн байгууллагаар дамжуулан сэрэмжлүүлэг хүргэх, гол усны дагуу эрсдэлтэй байршлуудад хориглосон тэмдэг байршуулах, камерын хяналт хийх гэх мэт олон ажлуудыг хэрэгжүүлж байна.

Харамсалтай нь он гарсаар өнөөдрийн байдлаар 2 дүүрэг, 13 аймгийн 27 суманд усны ослын 32 удаагийн тохиолдол бүртгэгдэж 37 хүн харамсалтайгаар амь насаа алдсан. Үүний 25 нь том хүн, 12 нь хүүхэд байна. Өнөөдрийн байдлаар Төв аймгийн Борнуур суманд 1, Дорнод аймгийн Баян-Уул суманд 1 усны ослын тохиолдлыг эрэн хайх ажиллагаа үргэлжлээд явж байна.

Иргэд анхаарал болгоомжгүй байх, бага насны хүүхдийг хараа хяналтгүй орхих, гол усны түвшин нэмэгдсэн үед гарц, гарамгүй газраар гарах, өөрсдийн машин техникт хэт найдаж эрсдэлтэй нөхцөл байдал руу орох гэх мэтийн шалтгаан нөхцөлөөс үүдэн осол эндэгдэл гарч байна.

Баталгаажсан гарц, гүүрээр гарч аюулгүй зорчих, гол усанд орохдоо хийлдэг завь, гудас гэх мэт янз бүрийн тоглоомуудыг ашиглахгүй байх. Энэ бол тухайн үед маш их эрсдлийг дагуулж, богино хугацааны хуй салхи үүссэн үед эргээд амь насанд халтай учир хүүхдүүдийг ийм тоглоомоор тоглуулахгүй байхад онцгойлон анхаарах шаардлагатай. Дээрээс нь архи согтууруулах ундааны зүйл хэрэглэсэн үедээ гол усанд орж сэлэх, голоор гарах гэх мэтийн эрсдэлтэй үйлдлүүдийг хийхгүй байх ёстой.

Хэдийгээр бид иргэдэд анхааруулан, хяналтыг тогтмол ажиллаж байгаа ч хүн бүрд төдийлөн хүрч ажиллах боломж бололцоо дутмаг байдаг. Тиймээс иргэд бие биедээ шаардлага зөвлөмжийг өгч, хараа хяналт тавьж байхгүй бол эрсдэлтэй нөхцөлүүд үүсэж байгааг онцгойлон анхааруулъя.

Хэт халалттай холбоотой ой хээрийн түймрийн эрсдэл нэмэгддэг. Тиймээс иргэд маань амарч зугаалж байхдаа ил задгай гал түлэхгүй байх гэх мэт мэргэжлийн байгууллагын зөвлөмжийг дагаж мөрдөх хэрэгтэй байна. Өчигдөр Завхан аймгийн Баянтэс суманд ой хээрийн 1 түймэр бүртгэгдэж, түймрийг цурманд нь оруулж унтраасан" гэв.