Жил бүр уламжлал болгон зохион байгуулдаг “Улаанбаатар марафон” олон улсын гүйлт тавдугаар сарын 24-ний бямба гарагт болов. Энэ жилийн хувьд 5 км, 21 км, 42 км гэсэн гурван өөр зайд өрсөлдсөн. Өнөө жил 30 мянга гаруй оролцогчтой байсан бөгөөд цаг агаар ч тэр таатай байсан нь оролцогдын сэтгэл ханамжийг өндөр байлгасан биз. Мөн уг уралдаанд гадаадын олон орны төлөөлөл оролцсон билээ. 

Тэгвэл тэдгээрийн нэг болох Камзах Хан гэх хүн уг тэмцээний талаар гомдолтой байгаагаа "Active Running Community" гэх фейсбүүк групп дээр нийтэлжээ.

Тодруулбал тэрбээр, "Арга хэмжээг зохион байгуулагчид юу ч зөв хийж чадахгүй. Энэ хурдыг хар. Төөрөгдүүлж байна. Анхан шатны математик шүү дээ. Уралдааны статистикийг гаргахдаа 100-д ​​битгий хуваа, секундэд хуваа. Таван минут 32 секунд байх ёстой! Хэн цагийг аравтын бутархайгаар уншдаг юм бэ? Эхнээсээ эцсээ хүртэл ичмээр байсан" гэжээ. 

Түүний хэлэх гэсэн санаа нь тэмцээнийг зохион байгуулагчид оролцогчдын барианд орсон статистикийг постер хэлбэрээр харуулахдаа км тутамд замаа туулсан "Дундаж хугацаа"-г нь минутаар, зууны нарийвчлалаар бичсэнд ундуйцсан бололтой. Түүний нийтлэл дор хүмүүс янз бүрийн байр суурьтай байгаа. 

Жишээлбэл "Цагийг чинь буруу бичсэний төлөө бүх зохион байгуулалтыг буруутгах хэрэггүй. Та эрүүл биетэй, сайхан постер зурагтай хагас марафоноо дуусгалаа. Гүйгч бүрт ийм зурагт хуудас хийж өгөөгүй" гэх мэтээр сэтгэгдлүүд хөвөрч байлаа. Түүний цахим хуудсыг харахад сүүлийн саруудад Монгол орноор болон Өмнөд Солонгосоор аялсан нэгэн аж. Мөн уг тэмцээний 21 км зайн ангилалд гүйжээ. 

"5.53 минут" тутамд нэг км зам туулсан гэхэд хүмүүс яаж ийгээд ойлгож уншихаар боловч "таван минут 53 секунд" гэчихсэн бол шүүмжлэл дагуулахааргүй байсан биз ээ. Олон улсын тэмцээний статистик ч олон улсынхаар байх ёстой байсан гэдэгтэй маргахгүй. Жаахан алдаа ч том шүүмжлүүлдэг гэдэг дээ. Гэхдээ олон улсад гэхээсээ илүүтэйгээр дотооддоо харуулах зорилготой зурагт хуудас байсан нь гарцаагүй. 

Л.Баяр