Ээлжийн амралтаа харамсахааргүй өнгөрүүлэх таван санааг санал болгож байна. 

Ганцаараа үүргэвчтэй аялалд гарах уу?

Үргэлж адал явдал хайдаг та амьдралын нэгэн хэвийн урсгалд орчихсон мэт санагдаж байвал, ээлжийн амралтаараа энэхүү хачин жигтэй энгийн байдлыг эвдэж, "ганцаараа" үүргэвтэй аялалд гарч болох юм. Үүргэвч, чихэвчээ аваад л галт тэргээр аялж эсвэл хот хоорондын автобусанд суугаад л хотоос хол гарч болох юм. 

Мартсан өөрийнхөө дүрд орох уу?

Амьдралын чөлөө завгүй урсгал биднийг хөгжилтэй, зугаатай мөчүүдээс хөндийрүүлж орхидог нь худлаа зүйл биш. Найзуудтайгаа хөгжилдөх үү, морь унаж давхих уу, ном унших уу, кино үзэх үү, тэмдэглэл хөтлөх үү, нам гүм өрөөндөө бүгэх үү, хамгийн дэгжин хувцсаа өмсөөд бүжиглэх үү. Ямар дүр төрхөө хүсэж байна вэ, түүнийгээ сэрээгээд үзээрэй. 

Зурагт ном бүтээж үзэх үү?

Ээлжийн амралтаараа зүгээр л амрах нь утгагүй санагдаж байвал, шинэ зүйл туршиж үзмээр байвал бяцхан зурагт ном (ер нь ямар ч байж болно л доо) бүтээж үзээрэй. Өөрийн дотор байгаа хүүхдээ сэрээх гайхалтай боломж биш гэж үү. Урт амралтын дараа өөрийнхөө шинэ авьяасыг нээчих ч юм билүү. 

Амар амгалангаа олох уу?

Бясалгалыг гэгээрэл гэж бодох хэрэггүй шүү. Зүгээр л өөртөө ойртож буйгаа мэдрэх цаг гэвэл илүү энгийн, илүү ойр. Ядарсан, яарсан зүрхээ амсхийлгэх мөч. Амар тайвнаар амралтаа өнгөрүүлж чадвал та өөртөө байгаа олон замыг олж харах ч юм билүү. 

Зүгээр л өнгөрөөх үү?

Ямар нэгэн шинэ зүйл заавал хийх албагүй, өөрийгөө хүчлэх ч шаардлагагүй шүү дээ. Юу ч хиймээргүй байвал юу ч хийхгүй байхад л болно. Нэг л мэдэхэд амралт дуусаж, долоо долоо хоногийн тойрог эргэлдэж эхэлнэ. 

М.Гал