Казахстан улсын Шымкент хотод наймдугаар сарын 25-31-ний өдрүүдэд зохион байгуулагдаж буй буудлагын спортын Ази тивийн аварга шалгаруулах 16 дахь тэмцээнд Монголын 6 дасгалжуулагч, 30 тамирчны бүрэлдэхүүнтэй оролцож байна.

Тэмцээний насанд хүрэгчдийн эрэгтэйчүүдийн сонгомол гар бууны 50 метрийн дасгалд Үндэсний шигшээ багийн тамирчин, ОУХМ Э. Даваахүү хүрэл медаль хүртлээ.

Тус төрөлд Иран улсын тамирчид алт болон мөнгөн медалийн эзэн болсон байна. Мөн хийн урт бууны өсвөрийн насанд охидын баг нийт багийн дүнгээр 1865.2 оноогоор хүрэл медаль хүртэж, Монголын буудлага спортын түүхэн амжилтын эзэд боллоо.

Монголын буудлага спортын түүхэнд Ази тивийн анхны медалийг 1987 онд гавьяат дасгалжуулагч Л. Ундралбат сонгомол гар бууны 50 метрийн дасгалд хүрэл медаль хүртэж эхлүүлж байсан бол, 1991 онд гавьяат тамирчин Д. Мөнхбаяр Ази тивийн анхны алтан медалийг авчирч байжээ. Ийнхүү Монголын  тамирчид буудлага спортын Ази тивийн аварга шалгаруулах тэмцээнээс дахин медаль хүртэж амжилтын буухиаг үргэлжлүүллээ.

О.Удвал