Өнөөдөр УИХ-ын чуулганы хуралдаанаар Монгол Улсын 2026 оны төсвийн төслийн гуравдугаар хэлэлцүүлгийг хийнэ.
Монгол Улсын 2026 оны нэгдсэн төсвийн:
- Тэнцвэржүүлсэн орлогыг 31.6 их наяд төгрөг,
- Нэгдсэн төсвийн нийт зарлага 32 их наяд 980 тэрбум төгрөг,
- Төсвийн тэнцэл ДНБ-ий 1.3 хувийн алдагдалтай байхаар төлөвлөжээ.
Засгийн газраас 2026 оныг “Боловсролыг дэмжих жил” болгон зарласантай холбогдуулан сургуулийн өмнөх болон ерөнхий боловсролд хамрагдалтыг 100 хувьд хүргэх, анги бүлгийн хүүхдийн тоог стандартын түвшинд хүргэж бууруулах зорилтыг дэвшүүлсэн.
2028 он хүртэл 95 цэцэрлэг, 108 сургуулийг шинээр барьж, шаардлагатай тоног төхөөрөмж, хэрэглэгдэхүүнийг хангах ажлыг үе шаттайгаар хэрэгжүүлэхээр төлөвлөжээ.
Улмаар улсын төсвийн хөрөнгө оруулалтаар 448.0 тэрбум төгрөг, гадаадын зээл тусламжаар 593.6 тэрбум төгрөг буюу нийт 1.0 их наяд төгрөгийг 2026 оны төсвийн төсөлд тусгажээ.
