Хөдөлмөрчин түмний хөлс хүч шингэсэн, тэдний ирээдүйн баталгаа болох хамгийн гол найдвар тээсэн зүйл бол Нийгмийн даатгалын сангийн мөнгө. Тэрхүү мөнгөнөөс завшина гэдэг лав ухамсартай хүний хийх үйлдэл биш хэмээн бухимдаж энэхүү захидлыг илгээж байна.

   Дархан-Уул аймгийн Нийгмийн даатгалын хэлтсийн удирдах ажилтнууд болон манай нөлөө бүхий хэд хэдэн банкны Дархан-Уул аймаг дахь салбарын захирлууд хуйвалдаж Нийгмийн даатгалын хэлтсийн тэтгэвэр болон ажилгүйдлийн сангийн мөнгийг  нэг банкнаас нөгөө банкинд шилжүүлэн байршуулж, хүүний мөнгийг нь завшсан хэрэг явдал гарч нэг хэсэг шуугиан тарьсан.
    Жирийн иргэдийн халаасруу дураараа гар шургуулдаг увайгүй байдлын тод жишээ энэ. Нийгмийн даатгалын санд хуримтлагдсан мөнгийг хүүлж, 220 сая төгрөгийг завшсан хэргийг Дархан-Уул аймгийн хуулийн байгууллагууд шалгасан боловч шалгалтын явцдаа тухайн хэрэг замхран гэмт этгээдүүд нь хариуцлага  хүлээлгүй өнгөрсөн байдаг.
   Хуулийн байгууллага шударга бус байдлыг шударга бусаар өөгшүүлдэгийг харж бухимдсан иргэд надад энэ хэргийн талаар байнга сануулж, яагаад хамгийн шударга байх ёстой, төрд тангараг өргөсөн хуулийн байгууллагын хүмүүс нь ийм булай үйлдэл хийгээд байна вэ гэж улалзтал асуудаг. Хуулийн байгууллага мөнгөтэй хүний талд ажилласаар байгааг, басхүү жирийн иргэд хэнд ч итгэх аргагүй болсоор байгааг дахин дахин хэлж буй иргэдтэй би санал нэг байна.

   Энэ хэрэг явдал одоо улсын ерөнхий прокурорын дэргэдэх мөрдөн байцаах албанд шалгагдаж байгаа тул үүн дээр анхаарлаа хандуулан, үнэн зөвийг нь шударгаар тогтоохыг онцгойлон хүсч байна. Албан тушаалаа урвуулан ашиглаж, гэмт этгээдүүдэд ял завших бололцоо олгосон албан тушаалтнуудад зохих хариуцлага хүлээлгэхээ Прокурорын байгууллага эрхбиш мэдэж байгаа гэдэгт итгэж байна.
   Асуудал хэрхэн шийдвэрлэгдэхийг Дарханы ард иргэд анхааралтай хүлээж байгаа. Шударга хөдөлмөрөөр олсон хөлснийхөө нэг хэсгийг төрдөө итгэн хадгалуулж байхад түүнд нь шунаг сэтгэлээр ханддаг хүн төрийн албанд байж болох уу. Ийм хэрэг явдал илэрчихээд байхад буруутай этгээдүүдэд ял завших боломж олгодог, түмэн олныг үл тоомсорлогч хүмүүс хуулийн байгууллагад ажиллаж болох уу.
Иргэдийн итгэл найдварыг алдах нь маш муу үр дагавартай гэдгийг хариуцлагатай алба хашиж буй хүн бүр мэдэж байх ёстой хамгийн энгийн зүйл. Хэсэг бүлэг шударга бус хүмүүсийн үйлдэл төрийн албанд, төрийн байгууллагад, цаашлаад төрд итгэх иргэний итгэлийг үгүй хийдэг.
Үнэн худлыг зааглан ялгах эрхэм хариуцлагатай Прокурорын байгууллага шударга ажиллана гэдэгт би итгэлтэй байна. Тиймдээ ч асуудал хэрхэн шийдвэрлэгдэхийг миний бие Дархан-Уул аймгийнхны, нийт иргэдийнхээ нүд чих нь байж тун анхааралтай ажиглаж байгаа гэдгээ дуулгая. Мөн прокурор хүн прокуророо хамгаалж, прокурорын байгууллагын шинэчлэлийг сааруулсан этгээдүүдээс салах цаг нь болсон гэдгийг эцэст нь сануулая.
Шударга үнэний төлөөх үйлсээ батжуулахыг та бүхнээс хүсье.