Жил бүрийн энэ өдрийг “Дэлхийн цаг уурын” өдөр болгон тэмдэглэж ирсэн уламжлалтай. Энэ жил Дэлхийн усны өдрийг “Усны хамтын ажиллагааны олон улсын жил” болгон тэмдэглэж байгаа бол “Дэлхийн цаг уурын” өдрийг “Цаг агаарын ажиглалт хүн төрөлхтний амь нас, эд хөрөнгийг хамгаалах үйлсэд” сэдвийн дор тэмдэглэж байна. Манай улс цаг уурын байгууллагын өнгөрсөн түүхийн хугацаанд улс орны нийт нутгийг хамарсан ажиглалт хэмжилтийн нэгдсэн сүлжээ байгуулж, ус цаг уурын үзэгдэл, явцыг урьдаас танин мэдэх, байгалийн гамшиг үзэгдлээс урьдчилан сэргийлэх тогтолцоог бүрдүүлэн ажиллаж байна.

Эл өдрийн талаар Засгийн газырн хэрэгжүүлэхч агентлаг- Цаг уур, орны шинжилгээний газрын дарга, дэлхийн цаг уурын байгууллага дахь Монгол Улсын байнгын төлөөлөгч С.Энхтүвшин хэлэхдээ,  Монголын ард түмэн буурал түүхийнхээ бүхий л үед байгаль, дэлхий, агаар мандлын хувьсал, өөрчлөлтийг байнга тандан ажиглаж, огторгуйн одон гараг, эрхсийн байршил, хөдөлгөөн, төрх шинжээр цаг агаарын төлөв байдлыг тодорхойлж, амьдрал ахуй, улс орныхоо төрийн бодлого, аж ахуйн үйл ажиллагаагаа зохицуулж ирсэн түүхэн уламжлалтай.

 Өдгөөгөөс 89 жилийн тэртээ Судар бичгийн хүрээлэнгийн 1924 оны 3 дугаар сарын 23-ны өдрийн тогтоолоор уг хүрээлэнгийн үндсэн бүтцэд “Огторгуйн одон гариг ба цаг уурыг шинжлэх салаа” байгуулагдаж, Нийслэл хүрээ, Сонгины буланд цаг уурын өртөө ажиллуулах болсноор өнөөгийн Ус цаг уур, орчны хяналт шинжилгээний салбар үүсч хөгжих эхлэлийг тавьж, улмаар 1925-1927 онд цаг уурын 13 өртөө байгуулсан нь Монгол улсын нутаг дэвсгэрт ус цаг уурын тогтмол ажиглалт явуулах эхлэл болсон юм.

-Монгол улс Дэлхийн цаг уурын байгууллагын бүрэн эрхт гишүүнээр хэдэн онд элсэж байв?

- 1963 оны дөрөвдүгээр сарын 4-ний өдөр элссэнээр олон улсын энэ байгууллагатай хамтын ажиллагаа тогтоох, улмаар санхүүгийн дэмжлэг авах нөхцөл бүрдсэн юм.

ДЦУБ-аар дамжуулан ‘’БНМАУ-ын Ус цаг уурын албыг хөгжүүлэх, ус цаг уурын сүлжээг өргөтгөх‘’ НҮБ-ын тусламжийн төслийг 1968-1973, 1974-1979 онуудад 2 үе шаттай хэрэгжүүлснээр ус цаг уурын олон арван өртөө, харуул аэрологийн 2, Радарын 1 өртөө, Багаж, хэмжил зүйн товчоо, ЕС-1022 загварын машин бүхий Тооцоолон бодох төвийг тус тус шинээр байгуулж, олон арван мэргэжилтнийг сургаж, өмнө ажиллаж байсан ус цаг уурын өртөө, харуулыг шинэчлэн төхөөрөмжилсөн нь манай албаны цаашдын хөгжилд үнэлж баршгүй хувь нэмэр болсон билээ.

-Цаг уурчиддаа мэндчилгээ дэвшүүлэх үү?

­-Дэлхийн болон Монголын Ус, Цаг уурын өдөр, Монгол улсад Ус цаг уурын алба үүсч хөгжсөний 89 жилийн ой, Монгол улс Дэлхийн цаг уурын байгууллагын бүрэн эрхт гишүүнээр элссэний түүхт 50 жилийн ойг тохиолдуулан өнөөдөр энэ буянтай албанд хүчин зүтгэж буй нийт ус цаг уурчиддаа баярын мэнд хүргье. Мөн  үе үеийн ахмад буурлууддаа Засгийн газрын хэрэгжүүлэгч агентлаг-Цаг уур, орчны шинжилгээний газрын даргын зөвлөлийн нэрийн өмнөөс болон хувиасаа аз жаргал, сайн сайхныг хүсэн ерөөе.

Д.Ундрах /24tsag.mn/