Ийм л зохицуулалт хийх байсан бол анхнаасаа шинэ үйлчилгээ нэвтрүүлнэ. Эндээс та сонголтоо хийгээрэй гэсэн бол иргэд өнөөдөр бухимдахгүй л байлаа. Хугацаатай хэрэгжүүлэх нэрийн дор Мобиком компани эндээс яаж бултах вэ гэсэн арга чаргаа хайсан бололтой.

    Энэ сарын 15-наас эхлэн  монголчууд 10 секунд ярьсан ч нэг минутын төлбөр төлдөг жишигт шилжлээ.
    Уг нь өнгөрсөн онд Шударга өрсөлдөөн хэрэглэгчийн төлөө газрын дарга нар Үүрэн телефон операторуудтай ширээний ард суун ярианы төлбөрийг секундээр тооцох хэлэлцээ хийж,  хугацаатайгаар хэрэгжүүлэх болсон нь ард түмэнд таалагдсан.
Гэвч хэрэгжих дээрээ тулсан чинь Үүрэн телефоны операторууд хэлсэн амнаасаа буцах нь тэр. Хэрэглэгч нэг минутаар тооцон төлж байснаасаа илүү үнэ төлөх болов.

 “Сахил хүртээд шал дордов” гэгчээр үүрэн холбооны оператор компаниудаас санал болгож буй нэг секундын ярианы төлбөр одоогийн төлбөртэй харьцуулахад хоёр дахин их болсонд хэрэглэгчид эгдүүцэж байна. Ярьсан секундын төлбөр төлнө гэж бодож байсан бол харин ч эсрэгээрээ болов.

    Энэ тухай ШӨХТГ-ын Өрсөлдөөний зохицуулалтын хэлтсийн дарга Л.Ган-Өлзийгөөс тодруулахад  “Хүмүүс гуравдугаар сарын 1-нээс эхлэн бидний ярьсан төлбөр  автоматаар секундээр тооцогдоно гэж ойлгож байсан. Гэхдээ энэ бүгд хуучнаараа зөвхөн шинэ үйлчилгээ гарч байгаа юм. Хэрэглэгч секундын үйлчилгээг сонгож болно, таалагдахгүй бол хуучин үйлчилгээ рүүгээ шилжиж болно” гэсэн нь өнөөх хэлэлцээ хийж байсан үетэйгээ алд дэлэм зөрөх нь тэр.
   
    Ийм л зохицуулалт хийх байсан бол анхнаасаа шинэ үйлчилгээ нэвтрүүлнэ. Эндээс та сонголтоо хийгээрэй гэсэн бол иргэд өнөөдөр бухимдахгүй л байлаа. Хугацаатай хэрэгжүүлэх нэрийн дор Мобиком компани эндээс яаж бултах вэ гэсэн арга чаргаа хайсан бололтой.
    Учир нь тус корпораци секундээр тооцох шинэ журмын дагуу Харилцаа холбооны зохицуулах хорооноос гаргасан нэг секундын ярианы төлбөр 1,7 төгрөгөөс доошгүй байх гэсэн шийдвэрийг бамбай болгов. Энэ тухай ШӨХТГ-ын Өрсөлдөөний зохицуулалтын хэлтсийн дарга Л.Ган-Өлзий ярихдаа,“Мобиком компанийн хувьд Харилцаа холбооны зохицуулах хороонд тарифаа нэмэх асуудлыг тавьж нэг минутын ярианы төлбөрийг 1.7 төгрөгөөр нэмэх шийдвэр гарсан юм билээ. Үүнд манайхаас шаардлага тавих боломжгүй. Учир нь Харилцаа холбооны тухай хуулиар энэ эрхийг олгосон тул бид хөндлөнгөөс оролцох боломжгүй” хэмээн тайлбарлав.Зах зээлийн хуулийг зөрчин үнийг хүчээр хязгаарладаг байсан төр энэ удаад хүчээр нэмэхийг шаардсан бололтой. Товчхондоо бол “Мобиком” секундын тариф нь 1,7 төгрөгөөс доош байхаар тогтоовол бусад оператор компаниудын зах зээлд оршин тогтнох эсэх асуудал бэрх болох тул ийнхүү “Мобиком”-ын тарифын доод хэмжээг тогтоож, бусад нь өрсөлдөөний журмаар арай бага үнэ тогтоосон гэнэ. Ингээд “Мобиком” нэг секунд нь 2,2 төгрөг, “Скайтел” 1,8, “Юнител” 2,0 төгрөг зэргээр үнээ тогтоожээ. Хамгийн бага үнийг тогтоохоос бус дээд үнийг тогтоодоггүй тул өнөөдөр 2,2 төгрөг гэх тариф мөрдөгдөж эхэллээ.

    “Мобиком”-ын урьдчилсан төлбөрт үйлчилгээний хэрэглэгч өмнө нь сүлжээндээ 50 секунд яриад 70 төгрөг төлдөг байсан. Харин шинэ буюу секундын үйлчилгээ рүү шилжвэл 50 секунд яриад 110 төгрөг төлөхөөр болж байна. Тэгэхээр нэг минут хүрэхгүй ярьдаг хэрэглэгчдэд бус, 10 секундээс дотогш ярьдаг хүмүүст зориулсан зохицуулалтыг хийв бололтой. ШӨХТГ-ын сүр дуулиан болсон хэлэлцээ ийнхүү үр дүнгээ өгсөнгүй. Монголын хэлэлцээ дундаа гацаж ажил хэрэг нь болдог нь ховор гэдгийг энэ удаагийн секундын ярианы төлбөр ч баталлаа.

Ингээд секундын ярианы төлбөрийн талаарх иргэдийг яриаг хүргэе.

СХД-ийн иргэн:Л.Гантулга
-Эхлээд сайхан зүйл ярьчихаад хэрэгжихгүй байгааг ойлгохгүй байна. Мобиком олон жил биднийг мөлжлөө шүү дээ. Одоо болимоор юм аа. Би Мобикомын хэрэглэгчээс татгалзсан.

БЗД-ийн иргэн:С.Алтанцэцэг
-Секундээр тооцно гэдгийг маш зөв шийдвэр гэж хүлээж авсан. О. Магнайг овоо юм хийх нь гэсэн чинь хачир дээрээ ажил хэрэг болсонгүй. Үнэхээр хийх гэж байгаа бол ажлаа бодитой болгох хэрэгтэй ш дээ. Сүүлдээ шинэ үйлчилгээ болж хувирах шив дээ. Ингэж ард түмнийг хаана хаанаа хуурч болохгүй шүү дээ.  Мобиком бол хэрэлэгчийнхээ тоог цөөлөх л бодлого барих юм. Үнэхээр үүнд сэтгэл дундуур байна.

СБД-ийн иргэн: А.Цоож
-Өнөө яриад байсан О.Магнай хааччихав аа. Дэд дарга нь мэдэгдэл хийх болов. Үнэхээр тэмцэж байгаа бол эцсийг нь хүртэл үзэх хэрэгтэй ш дээ. Дутуу зүйл хийхийн хэрэг юу байна вэ. Мобиком, Юнитель компани болих хэрэгтэй. Скайтель шиг ядаж 1,8 төгрөгөөр тооцож болдоггүй юм уу.

ЧД-ийн иргэн: С.Сүрэн:
-Их сайхан шийдвэр гаргалаа гээд О.Магнайг дэмжиж байлаа. Мобиком гэж яасан цадаж ханадагүй газар вэ. Хугацаа өгөөд байсны цаана будилаан үүсгэх гээд байсан юм биш үү. Секундээр төлбөр төлсөн дорвол минутаар нь төлсөн дээр юм билээ. Шинэ үйлчилгээ энэ тэр гээд нэрлэчихсэн нь хачирхалтай.