Сэргээн засах клиник эмнэлэг өндөр настнуудын хөлд дарагдаж, хэвтэх гэсэн хүмүүс өглөөний таван цагаас эхлэн дугаарлаж байна гэсэн мэдээллийн мөрөөр сэтгүүлч миний бие сурвалжлахаар зорилоо. Хан-уул дүүрэгт байрлах тус эмнэлэг “Оргил” рашаан сувилалын зэргэлдээ оршдог байна. Хоёр давхар шар байшинд Сэргээн засах клиник эмнэлэг төвхнөжээ. Хаалгаар орвол үүдэндээ  усан оргилууртай/ажиллаагүй/, хөгшчүүлд дасгал хийхэд зориулан талбайг тохижуулжээ.
Эмнэлгээр ортол эмч, сувилагч нар нь бололтой цагаан халаттай хүмүүс хананд өргөмжлөл өлгөж байгаа харагдав. Үүдний жижүүрт сурвалжлага хийхээр ирсэн тухайгаа хэлж эмнэлгийн даргатай уулзуулж өгөхийг хүслээ. Тэрээр “захирал эзгүй байна, та орлогч даргатай уулз” хэмээн өрөөг нь зааж өгөв.
Эл эмнэлэг их нам гүм юм. Нэг давхрын зүүн гар тийш эргэн Эмчилгээ хариуцсан орлогч дарга Одончимэгийн өрөөний үүдэнд ирэв. Өрөөнд нь хэдэн эмч нар хууч хөөрч байгаа бололтой байлаа. Зөвшөөрөл аван орж учир байдлаа хэлтэл Одончимэг эмч эмнэлгийнхээ талаар мэдээлэл өгөхөөс эрс  татгалзав. Ямар учраас мэдээлэл өгөхгүй байгааг асуувал “Ямар ч  хэвлэл мэдээллийн хэрэгслээр эмнэлгийнхээ тухай гаргамааргүй байна. Угаасаа манайхыг үйлчилгээ сайтай гэдгийг хүн бүхэн мэдэж байгаа. Өмнө нь телевизүүдэд яриа өгч, эмнэлгээ сурталчилсан чинь хүмүүсийн  дараалал улам нэмэгдэж бид маш ачаалалтай ажилладаг болсон” хэмээн халгаасангүй.
 Миний эрэл сурал болж бөөн хөдөлмөр гаргасан ажил маань ийнхүү эмнэлгийн орлогчийн үгээр таглуулав. Сэтгүүлч миний бие нэг хүний эрх ашиг бус нийтийн эрх ашгийн төлөө энд ирсэн юм.  “Ямар ч  хэвлэл мэдээллийн хэрэгслээр эмнэлгийнхээ тухай гаргамааргүй байна” хэмээн хээв нэг хэлэх эрхэм орлогч нийтийн эрх ашиг гэдгийг мэддэггүй бололтой. Энд хэвтэхийн тулд хэдэн хөгшчүүл 13А маягтаас эхлээд маш олон бичиг  баримт хөөцөлдөж дээр нь танил талтай нь л энэ эмнэлэгт хэвтдэг тухай эх сурвалж өгүүлж байна. Тэгэхээр  мэдээлэл цацахгүй хэмээн  хүнд суртал гаргаж буйн цаана юу нуугдаж байна вэ, энд ямар нэгэн “но” байгаа нь тодорхой гэсэн хардлага төрөхөөр байна.
 Одончимэг  эмч “Угаасаа манайхыг үйлчилгээ сайтай гэдгийг хүн бүхэн мэдэж байгаа” хэмээн хээв нэг хариулсан. Би болоод ойр торныхон маань энэ эмнэлгийн үйлчилгээ хэр вэ гэдгийг мэдэхгүй. Тиймээс салбарын сайд Н.Удвал энэ эмнэлгээрээ зочилж үйл ажиллагааг нь нээлттэй болгохгүй бол олон асуудал энд бугшиж мэдэх юм.  Уг нь эмч эмнэлгийн байгууллагууд хүний төлөө л үйчлэх ёстой. Гэтэл эл эмнэлгийн орлогч дараалал ихэсч,  ачаалал үүсдэг хэмээн ярьж буй нь хүний төлөө бус өөрийнхөө төлөө ажилладаг  нь илт байв.  Ямар ч байсан ирсний хэрэг  хэмээн эмчлүүлэгчээс яриа авах гэсэн боловч жижүүр нь хөөн хаалгаа тас хаах нь тэр.  Өвчтөнөөр “Сарын өмнө  бүртгүүлээд энэ сарын 22-нд хэвтсэн” гэснээс өөр үг хэлүүлж чадалгүй буцлаа.  Өвчтөнийхөө амыг таглах шахам биднээс холдуулж  үг хэлэх, санал бодлоо илэрхийлэх эрхийг  нь хориод байгаа эл эмнэлэг  хэр баргийн хүн нэвтрэхээргүй бяцхан “вант улс” болжээ. Дээр нь ямар ч байгууллагаар нэвтэрч сурвалжлах эрхтэй сэтгүүлчийн эрхийг боомилж буй эрх мэдэлтнүүддээ Н.Удвал сайд ямар хариуцлага хүлээлгэх вэ? Энэ мэтчилэн олон эмч, эмнэлэгт хүнд суртал нүүрлэсээр байгаа эрүүл мэндийн салбарыг хэн эмчлэх болж байна вэ. Эсвэл харилцааны соёлгүй ёс суртахуунгүй арми бэхжсээр байх уу.