Хөдөлмөрийн сайд Я.Санжмятав сэтгүүлчидтэй нээлттэй уулзалт хийлээ. Тус уулзалтаар Хөдөлмөрийн салбарт хийгдэж буй болон ирээдүйд хийх ажлынхаа талаар танилцуулсан юм.

Шинэчлэлийн Засгийн газар бүрэлдэж, Хөдөлмөрийн яамыг шинээр байгуулахдаа хөдөлмөрчин хүнд чиглэсэн, хөдөлмөрийн бүтээмжтэй ажлын байрыг бий болгох тал руу нь чиглүүлж байгаа. Өдгөө Хөдөлмөрийн яамнаас ажилтай, орлоготой Монгол хүнийг төлөвшүүлэхийн тулд судалгаа хийж, Мэргэжилтэй ажилтан бэлтгэн, сургалт үйлдвэрлэлийн төвүүдийг шинээр байгуулахаас эхлээд олон ажил хийж байгаа тухай Хөдөлмөрийн сайд Я.Санжмятав онцоллоо. Тэрээр мөн "Манай улсад хөдөлмөрийн насны 1,7 сая иргэн байна. Эдгээрийн нэг сая гаруй нь ажилтай. Үүнээс хувиараа хөдөлмөр эрхэлж байгаа иргэд 22 хувь, мал аж ахуй эрхэлж буй 26, цалинтай ажилчин 44, өрхийн үйлдвэрлэл зургаан хувь, нөхөрлөл хоршооныхон хоёр хувийг эзэлж байна. Харин 688 мянга нь эдийн засгийн идэвхгүй хүн ам буюу суралцагч, тэтгэврийнхэн, хөгжлийн бэрхшээлтэй иргэд, өндөр настан ба хүүхдүүд байдаг.

Өнөөдрийн байдлаар улсын хэмжээнд ажил эрхлээгүй 87 мянган хүн байна. Энэ хавар МСҮТ-ийг 20, их, дээд сургуулийг 38 мянган залуучууд төгсөн, хөдөлмөрийн зах зээлд гарч энэ тоо нэмэгдэнэ. Энэ хүмүүсийг ажил, орлоготой болгох  нь Хөдөлмөрийн яамны зорилго юм" гэсэн.

Ажил хийх идэвхгүй иргэдийг мэргэжилтэй боловсон хүчин болгохын тулд МСҮТ-д сургах ажлыг зохион байгуулахаар Хөдөлмөрийн яам ажиллаж байгаа аж. Ажлын идэвхгүй хүмүүсээс тэтгэвэрт 108 мянга, хүүхэд асарч байгаа 64,5 мянга, хөгжлийн бэрхшээлтэй 57 мянга, өндөр настан 45 мянган хүн байдаг аж.  

Я.Санжмятав “Монгол Улсын хэмжээнд ажилгүй 87 мянга 800 хүн байгаа бөгөөд ажилгүй байгаа иргэдийг ажилтай болгох зорилготой ажиллаж байна. Мөн ажлын идэвхгүй хүмүүсээс тодорхой хэмжээгээр улирлын чанартай ажиллуулах бодлого баримталж байна. Манай яам байгуулагдсан цагаас эхлэн “Ажилтай, орлоготой монгол хүн” хөтөлбөрийг хэрэгжүүлж эхэлсэн” гэлээ.

Одоогийн байдлаар 28 мянган мэргэжилтэй ажилтан хэрэгцээтэй гэж ажил олгогчдын зүгээс санал болгосон. Харин ажил хайж байгаа хүн нь 30 гаруй мянган иргэн бий. Ажлын байр, ажиллах хүчин хоёрын хооронд ийм зөрүү гарч буй нь чадамжтай, хариуцлагатай ажилтан цөөн байгаатай холбоотой. Мөн дээд боловсролтой бус мэргэжилтэй ажилтан дутагдаж байгаагийнх гэж Я.Санжмятав хэлсэн юм. Засгийн газраас мэргэжилтэй ажилтан бэлтгэхээр Мэргэжил сургалт үйлдвэрлэлийн төвүүдэд ажил идэвхтэй хайж байгаа иргэдийг сургаж, ажлын байранд зуучилж байгаа юм байна. Мэргэжилтэй ажилтан бэлтгэх сургалтын хоёрдугаар ээлж эхэлсэн бөгөөд нийт төгсөгчдийн 70 гаруй хувь нь шууд ажлын байртай болж байгаа нь Хөдөлмөрийн яамны хэрэгжүүлж буй ажлын үр дүн гарч эхэлж байна гэдгийг салбарын сайд нь онцолж байлаа.