Улаанбаатар хотын эрхэм хүндэт иргэд ээ. Та бүхнийхээ энэ өдрийн амар мэндийг айлтган мэндчилье.

Монгол Улсын нийслэл Улаанбаатар хотноо энэ сарын 26-29-ний өдрүүдэд Ардчилсан орнуудын хамтын нийгэмлэгийн сайд нарын VII  бага хурлыг зохион байгуулах гэж байна. Дэлхийн 140 гаруй орныг эгнээндээ нэгтгэсэн Ардчилсан орнуудын хамтын нийгэмлэгийг манай улс 2011 оноос эхлэн даргалж байгаа бөгөөд тус нийгэмлэгийн сайд нар хоёр жилд нэг удаа хуралдаж ардчиллыг хөгжүүлэх, дэлхий нийтэд тулгамдсан асуудлыг хэрхэн шийдвэрлэх тухай дээд төвшинд ярилцаж, харилцан туршлага солилцдог уламжлалтай.

Энэ удаагийн бага хурлын үеэр Монгол Улсын нийслэл Улаанбаатар хот түүхэндээ анх удаа 1000 гаруй зочин, төлөөлөгчийг хүлээн авахаас гадна эдгээр төлөөлөгчдийн дотор 10 гаруй орны төр, засгийн тэргүүн, Нобелийн шагналтнууд, ардчиллын манлайлагчид  манай улсад айлчлах гэж байна.

Монгол Улсад тэр дундаа Нийслэл Улаанбаатар хотод дэлхийн хэмжээний дээд төвшиний уулзалт болж,  олон улсад нэр хүндтэй ардчиллын манлайлагчид нийслэлд айлчлах болсон нь үнэхээр нэр төрийн хэрэг билээ.
Энэхүү бага хурлын гол зохион байгуулалтыг хотын захиргаа  хариуцаж байгаагаас гадна зочид төлөөлөгчдийг хүлээх авах, аюулгүй байдлыг хангахад  хурлыг зохион байгуулах Үндэсний хороо онцгой анхааран ажиллаж байна. Тиймээс нийслэл хотынхоо өнгө төрхийг сайжруулах, тохижилт, бүтээн байгуулалтын нэгдсэн ажлыг зохион байгуулж, зочид төлөөлөгчид болон нийслэлийн иргэдийн аюулгүй байдлыг хангах, хэт төвлөрөл, түгжрэлийг бууруулах, гарч болзошгүй гэмт хэрэг, зөрчлөөс урьдчилан сэргийлэх зорилгоор зарим арга хэмжээг түр хугацаанд хийхээр захирамж гаргалаа.

Тодруулбал: 4 сарын 26, 28-ны өдрүүдэд улсын дугаарын сүүлийн орон тэгш,  27,29-ний өдрүүдэд улсын дугаарын сүүлийн орон сондгой тээврийн хэрэгсэл өглөөний 07:00 цагаас оройн 21:00 цагийн хооронд тогтоосон хязгаарлалтын бүсэд замын хөдөлгөөнд оролцохгүй бөгөөд энэ үеэр иргэдийнхээ ажлыг цалгардуулахгүйн тулд нийтийн тээврийн үйлчилгээнд гарах автобусны тоог нэмэгдүүлэн, троллейбусыг үнэ төлбөргүйгээр явуулахаар боллоо. Мөн томоохон худалдааны төвүүдийн цагийн хуваарьт өөрчлөлт оруулж түр хугацаанд амраахаар шийдвэрлээд байна.

Энэхүү түүхэн арга хэмжээг эх орондоо амжилттай зохион байгуулж дэлхий нийтэд Монгол Улсаа сайн сайхнаар сурталчлан таниулах ажилд нийслэлийн иргэн бүрийг оролцоорой гэж уриалж байна. Дэлхийн өнцөг булан бүрээс хүрэлцэн ирсэн зочид төлөөлөгчид болон хэвлэл мэдээллийн ажилтнууд гурван өдрийн турш манай улсын талаар дэлхий нийтэд мэдээлэх энэ цаг үед эх орноо дэлхийн сонорт гэрэлтэй, гэгээтэйгээр сурталчлан таниулах таатай боломжийг та бид алдах учиргүй юм. Нийслэлчүүд ээ, Та бидний хамтын зүтгэлээр энэхүү дэлхийн хэмжээний түүхэн арга хэмжээ үр дүнтэй, зохион байгуулалт сайтай болно гэдэгт огтхон ч эргэлзэхгүй байна.

                                                           Сайн үйлс бүхэн дэлгэрэх болтугай