Петрочайна Дачин Тамсаг /Монгол/ ХХК нь Дорнод аймгийн Матад суманд 1.3 тэрбум төгрөгийн хохирол учруулсан талаар иргэд мэдээлэл хийлээ. Хэргийг тодруулбал одоогоос хоёр жилийн өмнө Матад сумын иргэд өөрсдийн эрх ашгийг хамгаалж Петрочайна Дачин Тамсагийн хууль бус үйл ажиллагааны эсрэг Баянзүрх дүүргийн шүүхэд өргөдөл гаргасан байна.

Өргөдөлд:

1.    “Петрочайна Дачин Тамсаг ХХК нь өөрийн үйл ажиллагааны явцад Дорнод аймгийн Матад сумын байгаль хамгаалах, нөхөн сэргээх үйл ажиллагааг хангалтгүй явуулсан гэдгийг тогтоох.

2.    “Петрочайна Дачин Тамсаг /Монгол/” ХХК-ийг байгаль хамгаалах төлөвлөгөөний дагуу байгаль хамгаалах ажиллагаа явуулах, байгаль орчныг нөхөн сэргээх ажлыг гүйцэтгэхийг хариуцагчид даалгах.

3.    Тус нутагт оршин сууж байгаа иргэд болон байгаль орчинд учирсан хохирлыг тооцож, нөхөн төлбөр тогтоон сумын ард иргэд болон сумын ИТХ-д олгуулах зэрэг шаардлагыг тусгажээ.

Анхан шатны шүүх хурал гурван удаа хойшилсны дараагаар дөрөв дэх удаагийнхаа хуралдаанаар “Петрочайна Дачин Тамсаг /Монгол/” компанийг Дорнод аймгийн Матад сумын Буян-Өндөр багийн нутагт газрын тосны үйл ажиллагаа явуулахдаа байгаль хамгаалах, нөхөн сэргээх үүргээ бүрэн биелүүлээгүй болохыг тогтоож, байгаль орчинд учирсан хохирол болох 1 тэрбум 356 сая 622 мянга 460 төгрөгийг Матад сумын төсөвт олгохыг даалгасан байна.

Гэтэл “ПЧДТ” ХХК нь энэхүү шийдвэрийг эсэргүүцэн Нийслэлийн шүүхэд давж заалджээ. Улсын дээд шүүхийн нийт шүүгчдийн хуралдаанаар гомдлыг хангах  үндэслэлгүй гэж үзжээ.

Шат шатны нүүх хурлын шийдвэр ард иргэдийн талд гарсан байхад Петрочайна Дачин Тамсаг компани “Шинээр илэрсэн нөхцөл байдлын улмаас шүүхийн шийдвэрийг дахин хянуулах тухай” гэсэн шалтаг гаргаж шүүхийн шийдвэрийг биелүүлэхээс татгалзаж байгаа аж.

Мөн өнгөрөгч тавдугаар сард энэ байдлаа давтаж тус компани хэд хэдэн удаа хурлыг хойшлуулжээ.

Ийнхүү “Петрочайна Дачин Тамсаг /Монгол/” ХХК нь хоёр ч удаа “шинэ нөхцөл байдал үүсчихлээ” гэх шалтгаанаар шүүх хурлыг олон удаа хуралдуулж байгаа нь Шүүхийн байгууллагыг үл тоомсорлон тоглоом хийсэн үйлдэл гэж тэд үзэж байгаа юм. Басхүү байгаль орчинд учруулсан нөхөн төлбөрийг өгөхөөс бултаж байгаа арга заль гэж иргэд үзэж байгаа аж.

Матад сумын иргэд ийнхүү дургүйцлээ илэрхийлж энэхүү нөхцөл байдлыг таслан зогсоон шүүхийн шийдвэрийн дагуу компанийн хохирлыг нөхөн төлүүлж, хариуцлага хүлээлгэхийг хууль сахиулагчдаас хүслээ.