Нийслэлийн сонгуулийн хорооноос мэдээлэл хийлээ. Хэвлэлийн хуралд Нийслэлийн сонгуулийн хорооны дарга Ё.Гэрэлчулуун, нарийн бичгийн дарга Ц.Отгонбагана нар нийслэлийн хэмжээнд сонгуулийн бэлтгэл ажил хэрхэн хийгдсэн талаар цаг үеийн мэдээлэл өглөө.

Хуулийн адгуу нийслэлийн сонгуулийн хороо нь 7 хүний бүрэлдэхүүнтэйгээр ажиллаж байгаа бөгөөд 9 дүүргийн сонгуулийн хороо, 368 хэсгийн хороонд нийт 2646 төрийн албан хаагч, Нийслэл дүүргийн мэдээллийн технологийн багт 43 ажилтан, хэсгийн хороодод 407 даамал гэсэн бүрэлдэхүүнтэйгээр Монгол Улсын Ерөнхийлөгчийн 2013 оны сонгуулийг зохион байгуулан ажиллаж байна.

Нийслэлийн хэмжээнд нийт 841 858 сонгогч санал өгөхөөр үндсэн сонгогчийн нэрсийн жагсаалтад бүртгэгдсэн байна. Эдгээр иргэдээс  5148 сонгогч зөөврийн саналын хайрцгаар санал өгөхөөр урьдчилан бүртгүүлж, хуулийн дагуу өнөөдөр /06 сарын 25/ санал авах ажиллагаа явагдаж байна.

Сонгуульд оролцож буй намууд өнгөрсөн хугацаанд 22 гомдол ирүүлсэн бөгөөд Нийслэлийн Ардчилсан намын сонгуулийн штабаас Монгол Улсын Ерөнхийлөгчийн сонгуульд нэр дэвшигч Б.Бат-Эрдэнэ сонгуулийн хуулийн холбогдох заалтуудыг зөрчсөн талаар 18, мөн намаас МАХН-аас нэр дэвшигч Н.Удвал сонгуулийн хуулийн холбогдох заалтуудыг зөрчсөн талаар 3, нийслэлийн МАН-ын хорооноос АН-ын нэр дэвшигч Ц.Элбэгдорж сонгуулийн хуулийг зөрчсөн талаар 1 гомдол гаргасныг Монгол Улсын Ерөнхийлөгчийн сонгуулийн тухай хуулийн 67.2 заалтын дагуу Нийслэлийн Цагдаагийн газарт уламжлан шалгуулж байгаа аж.

Дүүрэг, хэсгийн хороодод ажиллаж буй нийт ажилчид нэгдсэн мэдээллээр бүрэн хангагдсан бөгөөд нийт хэсгийн хороо бүр дээр хяналтын камер, дэлгэцийг байршуулж, цагдаагийн албан хаагчид хамгаалалтад авсан.  Өнгөрөгч долоо хоногт санал авах машины ажиллагааг шалгах туршилтын санал авах, өгөгдөл дамжуулах ажиллагаа амжилттай болсон. Гэвч тог тасрах, санал авах машин гацах зэрэг учирч болох эрсдэл гарч болзошгүй учраас Нийслэлийн сонгуулийн хороо, дүүргийн хэсгийн хороодууд бэлтгэл ханган ажиллаж байна. Маргааш /06 сарын 26/ нийслэлийн хэмжээнд 07 цагаас Монгол Улсын Ерөнхийлөгчийн 2013 оны сонгууль эхлэх бөгөөд санал авах хэсгийн хороодын бэлтгэл ажил бүрэн хангагдлаа.

Энэ удаагийн Монгол Улсын Ерөнхийлөгчийн сонгуулийн үйл ажилллагыг гадаадын 34 улс, ОУ-ын байгуулагын 400 орчим ажиглагчид ажиглахаар албан ёсоор бүртгүүлээд байна. Нийслэлийн сонгуулийн хорооноос санал хураах үйл явцыг олон нийтэд нээлттэй ил тод болгоход анхаарч бүх хэсгийн хороодод хяналтын камер суурилуулж, сонгуулийн үйл явцыг онлайнаар хянах боломж бүрдүүллээ. www.ulaanbaatar.mn цахим хуудасны Нийслэлийн сонгуулийн хороо гэсэн хэсэгт хандаж Ерөнхийлөгчийн сонгуулийн нийслэл дэх 60 хэсгийн хорооны  санал авах үйл ажиллагааг шууд үзэх боломжтой.

Мөн сонгогчид хаана санал өгөхөө мэдэхгүй байгаа тохиолдолд 1199 тусгай дугаарын утсанд хандан өөрийн харъяа санал өгөх хэсгийн хорооны байршлыг тодорхой заалгах боломжтой юм.

“Монгол улсын Ерөнхийлөгчийн сонгуулийн тухай хууль”-д санал авах өдөр согтууруулах ундаагаар үйлчлэх, худалдах, соёл урлаг, үзвэр, спортын аливаа арга хэмжээ зохион байгуулах, гадаа болон битүү талбайд үйл ажиллагаа явуулдаг худалдаа, үйлчилгээний төв ажиллахыг хориглосон байдаг. Үүнтэй холбогдуулан нийслэлийн Засаг дарга “Монгол Улсын Ерөнхийлөгчийн сонгуулийн тухай хуулийн хэрэгжилтийг хангах зарим арга хэмжээний тухай” захирамж гаргасан.

Захирамжийн дагуу:
-Бүх төрлийн зах, худалдааны төвүүд амарна.
-Нийслэлийн нутаг дэвсгэрт архи согтууруулах ундаа худалдах, түүгээр үйлчлэхийг хориглоно.
- Нийтийг хамарсан спорт, соёл урлагийн арга хэмжээ зохион байгуулахыг хориглоно.

Мөн  маргааш өдрийг бүх нийтийн амралтын өдөр болгосон тул нийслэлийн Засаг даргын захирамжийн дагуу автомашины дугаарын хязгааралалт энэ өдөр үйлчлэхгүй юм.

2013 оны 6 дугаар сарын 26-ны өглөөний 07 цагаас сонгуулийн санал авах ажиллагаа эхлэснээс хойш 4 цаг тутам буюу 11, 15, 19, 23 цагуудад ирцийн мэдээлэл дүүргийн сонгуулийн хороодоос нэгтгэгдэн ирэх бөгөөд тухай бүрд нь Нийслэлийн сонгуулийн хорооноос сэтгүүлчид болон олон нийтэд мэдээлэл өгнө” гэлээ. Ийнхүү нийслэлийн хэмжээнд сонгуулийн үйл ажиллагаа хуулийн дагуу эхлэхэд бэлэн боллоо. Харин нийслэлчүүдийг үндсэн хуулинд заасан эрхээ эдэлж сонгуульдаа идэвхитэй оролцохыг Нийслэлийн сонгуулийн хорооноос уриалж байна гэж Нийслэлийн Сонгуулийн хорооноос мэдээллээ.