Наадмаас өмнө ашиглалтанд орох замуудын талаар мэдээлж байна.   "Тэгшт Плант" ХХК гүйцэтгэж байгаа 22-ын товчоо чиглэлийн авто замын Моносын уулзвараас баруун тийш таван километр авто замын зорчих хэсгийн урд урсгалыг болон "Эрдэнэ зам" ХК гүйцэтгэж байгаа замын хойд урсгалыг ирэх сарын 05-нд хүлээлгэж өгөх аж.

Доржийн гудамжны баруун талд, КТМС-ийн урд 120 метрт хучилт хийж дууссан.  Тэгвэл ирэх сарын 05-нд Хил хамгаалах алба хүртэлх 630 метр замыг хучиж нээхээр "Беринг" ХХК ажиллаж байгаа юм. Одоогоор Хил хамгаалах албанаас зүүн тийш Цайз зах хүртэлх замын өргөтгөлийн трасст орсон объектын 60 хувийг чөлөөлөөд байна.

Шарга морьт - Жигжидийн уулзвараас Гүнтийн даваа чиглэлд таван километр авто замын ажил гүйцэтгэхээр "Жэй Кэй Си" ХХК гэрээ байгуулан, зургадугаар сарын 21-нээс эхлэн уулзвараас хойш 900 метр замын хөдөлгөөнийг хаасан билээ.  Уг замын өргөтгөл хэсэгт газар шорооны ажил, ус зайлуулах хоёр төмөрбетон хоолойг угсрах ажлыг хийж бай бөгөөд ирэх  сарын 10-нд  нээх юм байна.

Офицеруудын ордноос баруун тийш 400 метр замд суурь хучилт хийж дууссан.  Харин зүүн дөрвөн зам хүртэлх замыг "Ялгуусан" ХХК хэсэгчлэн хааж хучих ажлыг гүйцэтгэж байгаа бөгөөд ирэх сарын 09-нд замыг нээх юм.

Он дамжин засвар хийгдэж буй Сэлбийн хос гүүрийн хойд гүүрэнд Т хэлбэрийн дам нуруу тавьж дууссан байна. Гүүрийн засварын ажлыг "Мотор Сервис" компани гүйцэтгэж байгаа бөгөөд улсын төсвөөс нийт хоёр тэрбум төгрөг зарцуулжээ.  Наадмаас өмнө буюу ирэх сарын 10-ны  өглөө замын зорчих хэсгийг төлөвлөсөн ёсоор  нээх аж.