Бүтэн жил хүлээсэн Үндэсний их баяр наадам эхлэхэд хоёрхон хоног үлдлээ. Наадамд хэн түрүүлэхийг ард түмэн хэлэхэд хэцүү болсон. Учир нь сүүлийн жилүүдэд хэн ч түрүүлж болдог жишиг тогтчихоод байгаа. Тиймээс л наадмыг үзэх ярих юмтай хэмээн олон хүн ярилцан хүлээсээр ирэв.

Харин дуулиант найрааны асуудлыг цэгцэлж чадахгүй наадамтайгаа золголоо. Тэр ч бүү хэл бөхчүүдийн авлигалын асуудалд МҮБХ-ны тэргүүн Р.Нямдорж нэр холбогдоод авсан. Учир нь өнгөрсөн оны арван нэгдүгээр сард Улсын арслан Х.Мөнхбаатар хэвлэлийнхэний өмнө “Р.Нямдорж гэдэг хүн олон жил намайг нүд үзүүрлэж байсан. 2007 оны наадмаар хүү Н.Ганбаатарыгаа дэмжээд заан болгочих, 70 сая төгрөг өгье гэж байсан. Гэхдээ би татгалзсан. Намайг “Чи яасан овоо хүүхэд вэ, Чи намайг хараарай” гэж байсан” хэмээн зарласан. Бас энэ явдлаас хойш МҮБХ-ны тэргүүн арслан Х.Мөнхбаатарыг олон удаа хавчиж хяхсан гэж яригдсан. Учир нь 2009 онд түүнийг Г.Өсөхбаяр аваргатай барилдсан нь дүрмийн бус болсон, мөн 2011 онд долоогийн даваанд гарьд Ж.Бат-Эрдэнэтэй барилдсаны дараа хөлийн цэц буруу дүгнэсэн. Энэ маргаануудаар ч Х.Мөнхбаатар арслан өргөдөл өгч байжээ. Харин түүнийг нь Р.Нямдорж тэргүүн хүлээж авдаггүй байж. Эцэст нь түүнийг өнгөрсөн наадмаар сэргээш хэрэглэсэн тухай МҮБХ яаран сандран зарласан нь галыг өрдөх шиг болсон.

Харин арслангийн энэ маргааны дараа МҮБХ-ны тэргүүн Р.Нямдорж “Надтай таараад нүүр эгцэлж харж чадахгүй байгаа Х.Мөнхбаатарыг уучлал гуйхыг хүлээж байна. Хэрвээ уучлалт гуйхгүй бол хууль шүүхийн байгууллагад хандаж, удмынхаа нэр хүндийг цэвэрлэнэ” хэмээн хэлж байсан юм.

Энэ үйл явдлаас хойш хагас жил болов. Улсын арслан ч уучлал гуйсангүй. МҮБХ-ны тэргүүн ч хууль шүүхийн байгууллагад хандсангүй. Улсын арслан хүн надад хахууль өгөх гэж оролдсон гэж түмэн олны өмнө мэдэгдээд байхад хүндэт АТГ ажлаа хийсэнгүй. Иймэрхүү ил цагаан яригдсан асуудлыг уг нь хамгийн түрүүнд шалгаад мухарлаад олон түмэнд мэдээлж баймаар юм.

Эсвэл уг дуулиант хэргийг АТГ шалгаад чимээгүй орхиё гэж шийдсэн юм болов уу. Ямартаа ч чимээгүй байсаар наадамтай золгов. Ийм дуулианд холбогдож мэдэгдэл хийж, сэргээш хэрэглэсэн нэрээр өнгөрсөн жилийнхээ чимэгийг хураалгаж, барилдах эрхээ хасуулж явсан Х.Мөнхбаатар арслан шарандаа “энэ жилийн наадамд тултал барилдах болно” гэдгээ мэдэгдэв.