“Юм гэдэг учиртай” хэмээх үгийн утга учир ч энэ наадмаар бас харагдлаа. Учир нь энэ жилийн наадмын хөтөлбөрөөс АН-ынхан 1921 оны Ардын хувьсгалыг хасчихсан юм.

   “Юм гэдэг учиртай” хэмээх үгийн утга учир ч энэ наадмаар бас харагдлаа. Учир нь энэ жилийн наадмын хөтөлбөрөөс АН-ынхан 1921 оны Ардын хувьсгалыг хасчихсан юм. Тэгээд Ардын хувьсгалын 93 жилийн ой хэмээх үгийг албаны хөтөлбөрүүдээс гээчихсэн. Ардын хувьсгал хэмээх үгийг хассанаас болоод МАН-ын бүлэг завсарлага авч ихээхэн асуудал үүсгэсэн дээ.

    Харин АН-ын энэ хандлагад МАН-ын бүх гишүүд дээр нэмэгдээд АН-аас ганцхан хүн дургүйцлээ илэрхийлсэн юм. Энэ эрхэм бол УИХ-ын гишүүн С.Баярцогт байлаа. Тэрээр “Манай Сэлэнгэ аймаг бол Ардын хувьсгалыг эхлүүлсэн өлгий нутаг. Энэ түүхээр бахархаж өссөн. Ардын хувьсгал гэдэг үгээ хэрэглээд явах ёстой. Хуулийг хэрэгсэхгүй байгаа төрийн албан тушаалтнуудад хариуцлага тооцох ёстой” хэмээн зориг гаргаж үг хэлжээ. Ингэж хэлэх ч шалтгаантай байж. Учир нь Ардын хувьсгалын 93 жилийн ой хэмээх үгийг хасах гэж байгааг дуулсан Сэлэнгэчүүд ихээхэн дургүйцэж, сонгогдсон гишүүддээ үгээ дайжээ. Тэдгээр үгс нь С.Баярцогтын амаар илэрхийлэгдсэн хэрэг.


    Сэлэнгэ аймаг бол 1921 оны Ардын хувьсгалын гал голомт болсон ариун газар. Анх Ардын хувьсгал энэ аймгаас эхэлж, гол тулалдаанууд энэ аймагт өрнөсөн. Бас тусгаар тогтнолынхоо төлөө амиа алдагсадын ихэнхи нь энэ аймгийнх. Тиймээс 1921 оны тусгаар тогтнолын төлөөх Ардын хувьсгал бол Сэлэнгэ нутгийнхны бахархах гол үнэт зүйл гэдэгтэй хэн ч маргахгүй. Хуульчлагдсан тэрхүү бахархал бишрэлийг нь энэ жилийн наадмаас хассанд Сэлэнгэ нутгийнхан ихэд сэтгэл дундуур байв. Гэтэл 1921 оны Ардын хувьсгалыг хүчээр хассан наадамд 1921 оны хувьсгалын гал голомт болсон Сэлэнгэ нутгийн хүү түрүүлж Монгол Улсын 21 дэхь аварга болсон нь юуг өгүүлнэ вэ? 21 гэсэн энэхүү тоо Монголчуудын төдийгүй Сэлэнгэчүүдийн хувьд эрхэмлэх ёстой зүйл гэдэгийг харуулаад байгаа хэрэг үү? гэсэн эргэлзээг үүсгэлээ.

    Өчигдөр орой 21 оны гал голомт болсон Сэлэнгэ нутгийнхан 21 дэхь аварга төрсөнд баярлаж гудамжиндаа гарч, ёслолын буудлага хийжээ. Бас 21 оны ардын хувьсгалын гал голомт болсон нутагтаа 21 дэхь аваргаа хэрхэн угтах талаар аймгийн удирдлагууд нь шуурхай хуралдаан зарлаж шийдвэр гаргасан гэж эх сурвалж мэдээллээ.
Ийнхүү олон аавын хүүгийн амиар, бүх ард түмний хичээл зүтгэлээр ялалтад хүрсэн 1921 оны Ардын хувьсгалыг төрийн наадмаасаа хасаад байж болохгүйг өвөг дээдсийн ариун сүнс харуулах шиг боллоо гэж Сэлэнгэ нутгийнхан бас ярилцсан байна.