Өнгөрсөн баасан гаригт “Нарантуул” олон улсын худалдааны төвийн хүнсний зах шатаж, 300 гаруй түрээслэгч эд хөрөнгөөрөө хохироод байгаа билээ. Үүссэн нөхцөл байдалтай холбогдуулан, Нийслэлийн засаг дарга Э.Бат-Үүл захирамж гарган ажлын хэсэг байгуулсан. Мөн өнөөдрийн Нийслэлийн удирдах ажилтнуудын шуурхай зөвлөгөөнөөр “Нарантуул” худалдааны төвд гарсан галтай холбоотойгоор холбогдох албаны хүмүүс мэдээлэл, тайлбар өгч, цаашид ямар арга хэмжээ авч ажиллах талаар хэлэлцсэн юм.

Хуралдааны үеэр Нийслэлийн засаг дарга Э.Бат-Үүл хэлэхдээ "Галд шатсан хүнсний зах нь 1999 оноос үйл ажиллагаагаа явуулж эхэлсэн ч улсын комисс хүлээж аваагүй байсан. Тэгэхээр албан ёсоор үйл ажиллагаа явуулах зөвшөөрөл олгоогүй байсан гэсэн үг. Цаашилбал тус зах  нь худалдаа эрхлэх, үйл ажиллагаа явуулах зөвшөөрөлгүй байсан. Өнгөрсөн хугацаанд холбогдох байгууллагуудаас ”Нарантуул” захын удирдлагуудад зөрчлөө арилгах талаар 10 удаа албан шаардлага, гурван удаа акт хүргүүлсэн гэж байна. Гэвч тус захынхан үүнийг хэрэгжүүлэхгүй явснаас өнөөдөр ийм явдал болж, иргэд хохироод байна. “Нарантуул” захыг худалдааны төв гэж нэрлэж болохгүй. Зах л гэж нэрлэх хэрэгтэй. Яг үнэндээ нийслэлийн газрыг эзэмшиж авчихаад тэр газрыг түрээсэлж, их хэмжээний ашиг олж байгаа газар. Цаашид захуудыг хотоос нүүлгэх бодлого барина. Мөн шинжээчийн дүгнэлт гармагц түрээслэгчдийг ямар нэгэн хохиролгүй болгохын тулд нийслэлийн зүгээс бүх бололцоогоо дайчлан ажиллана” гэлээ.

Одоогийн байдлаар шаттсан объектыг тусгаарлаад байгаа аж. Мөн захын бусад хэсэгт худалдаа, үйлчилгээ  хэвийн ажиллаж байгаа аж. Онцгой байдлын алба, цагдаагийн хэлтэс, шинжээчдийн баг хамтран галын шалтгааныг тогтоох, галаас үлдсэн эд зүйлсийг илрүүлэн, аврах ажиллагааг зохион байгуулж байгаа бөгөөд энэ ажиллагааны хүрээнд галд шаталгүй үлдсэн иргэдийн багагүй эд хөрөнгө, мөнгө, бараа, бүтээгдэхүүн байсныг тогтоож, түрүүчээс нь эздэд нь өгсөн байна. Галын дүгнэлт гарсны дараа хэн түрээслэгчдийн хохирлыг барагдуулах тухай асуудлыг ярьж эхлэх юм байна. Ажлын хэсгийн Баянзүрх дүүргийн Засаг дарга Д.Пүрэвдаваа ахалж байгаа юм.