“Нарантуул” олон улсын худалдааны төвд гал гарсантай холбогдуулан нөхцөл байдлын талаар Улсын онцгой комиссын  нарийн бичгийн дарга Н.Энх-Амараас тодрууллаа. 

-Нарантуулын нөхцөл байдал өнөөдрийн байдлаар ямар байна вэ?

-Орчны хэвийн үйл ажиллагаа, нийгмийн хэв журам, аюулгүй байдлыг сахиулах, холбогдох хууль тогтоомжийн хэрэгжилтийг нэгдсэн удирдлагаар хангах, шуурхай арга хэмжээ авч хэрэгжүүлэх ажлын хэсгийг Нийслэлийн Засаг даргын 2013 оны а/798 дугаар захирамжаар Баянзүрх дүүргийн Засаг дарга Д.Пүрэвдаваагаар ахлуулсан 15 хүний бүрэлдэхүүнтэй байгуулагдан ажиллаж байна.

-Зооринд байсан бараа бүтээгдэхүүнийг гаргах ажил хэдэн хувьтай явагдаж байгаа вэ?

- 22 контейнерын бараа бүтээгдэхүүнийг эздэд нь олгож дууссан бөгөөд одоогийн байдлаар зоорийн давхарт байгаа 44 павилоноос 29 павилонд үзлэг хийж  ашиглах боломжтой бараа бүтээгдэхүүнийг эздэд нь олгож байгаа. Энэ ажил 80 хувьтай явагдаж байна.

-Галыг унтрааж, аюулгүй байдлыг нь хангахад нийт хэчнээн төгрөг зарцуулав?

-Уг үйл ажиллагаанд яаралтай нэг бүрийн хамгаалах хэрэгсэл, багаж тоног төхөөрөмжийн зардалд 11,9 сая, 18 ш контейнер худалдан авч тээвэрлэн байрлуулахад нийт 73,3 сая, хамгаалалтын тор байрлуулахад 3,8 сая, Цагдаагийн хамгаалалтын хяналтын камер байрлуулахад 46,9 сая, шатсан байгууламжийн сараалжин төмөр буулгахад 12,0 сая болзошгүй бусад зардалд 20,0 сая төгрөгийг зарцуулсан. Нийт 200-аад сая төгрөг зарцуулсан. Цаашид ч энэ тоо нэмэгдэж магадгүй.

-Түрээслэгчдийн хохирлыг "Нарантуул" захын удирдлагууд барагдуулах үндэслэлтэй болов уу?

-"Нарантуул" захын удирдлагууд түрээслэгчидтэйгээ байгуулсан гэрээндээ “Лангуун дээрээ нэг сая хүртэлх төгрөгийн бараа байх ёстой” гэж заасан байдаг юм байна. Түүнээс их байвал ямар нэгэн гамшиг болоход "Нарантуул" захын захиргаа хариуцахгүй байх, бараа бүтээгдэхүүнээ даатгуулсан байх  ёстой гэсэн гэрээ байгуулсан аж. Одоогоор гомдол гаргаад байгаа 100 гаруй хүний тал нь даатгалд хамрагдсан байна. Үнэхээр энэ гэрээний дагуу асуудлыг шийдэх бол хохирол бага гарах магадлал өндөр. Мөн зооринд хадгалагдаж байсан бараа бүтээгдэхүүний ихэнх нь бүрэн бүтэн байгаа болохоор хохирол бага гарах байх.

-Захын удирлагуудтай уулзсан уу?

-Удирдлагуудыг байцааж байгаа. Яг гал гарах үед тус захын удирдлагууд гадаадад явж байсан юм шиг байна билээ. Тэгээд галын талаар мэдэгдэхэд асуудалд жаахан удаашралтай хандаж байсан нь үнэн. Одоо харин байцаалтаа өгөөд явж байна.

-Галын шалтгааныг эцсийн байдлаар хэзээ тогтоох бол?

-Хэрэг гарсан шалтгааныг цагдаа, тагнуулын байгууллагынхан тогтоохоор нарийн шалгалт хийж байна. Одоогоор урьдчилсан хариу гараагүй л байна. Шадар сайд Д.Тэрбишдагва хуульд заасны дагуу хамгийн богино хугацаанд буюу 14 хоногийн дотор галын шалтгаан, хохирлын хэмжээг тогтоохыг үүрэгдсэн байгаа.