Дорноговь аймгийн Улаанбадрах суманд ураны хайгуул хийдэг Францын “Aрева” группийн охин компани болох "Кожегоби"-ийн үйл ажиллагааг түр хугацаагаар зогсоогоод байсан ч тус компани дахин олборлолтоо хийхээр болжээ. Уг нь Улаанбадрах сумын малчид, Гал үндэстэн холбооныхон нийлж цөмийн эсрэг тэмцлийг өрнүүлж, дөрвөн машин, 10 мотоцикль болон тэмээгээ унаж очин тус компанийн өрөмдлөг хийж буй цэгийг бүслэн хаасан юм. Тиймээс "Кожегоби" компанийхан өрөмдлөгөө түр зогсоож өрөмдлөгийн техникээ буулгаж, кемпээ татаад байсан билээ.
"Кожегоби" компанийн зүгээс малчидтай тохиролцож үйл ажиллагаагаа үргэлжлүүлэн явуулна гэж байсан ч малчид нутагтаа ураны хайгуул хийлгэхгүй гэж зүтгэсээр байгаа юм.
Харин өнгөрсөн долдугаар сарын 30-нд “Арева” компанийн удирдлагууд нутгийн иргэдтэй уулзаж, ажилд саад болох юм бол Монгол Улсын Засгийн газрыг олон улсын шүүхэд өгнө хэмээн мэдэгдсэн. Үүний дагуу “Арева” компанийнхан өнгөрсөн долоо хоногийн дундуур Засгийн газрын төлөөлөлтэй уулзаж, үйл ажиллагаагаа үргэлжлүүлэн явуулах зөвшөөрлөө авсан байна. Тус компани Дорноговь аймгийн Зүүнбаян багийн нутагт хийж буй хайгуулын ажлаа үргэлжлүүлж, хоёр өрмөөр өрөмдөхөөр болжээ.
Энэ талаар Байгаль орчны иргэний зөвлөлийн Цөмийн ажлын хэсгийн зохицуулагч Ч.Мөнхбаяраас тодрууллаа.
- Кожегоби компанийнхан дахин үйл ажиллагаагаа явуулахаар болжээ. Засгийн газрын зүгээс зөвшөөрлийг өгсөн гэж байна. Таньд энэ талаар мэдсэн зүйл байна уу? - Кожегоби компанийхан хамгийн сүүлд албан ёсоор хэнтэй уулзалт хийснийг би мэдэхгүй байна. Засгийн газрын төлөөлөлтэй уулзсан гэж дуулдаж байгаагаас үзвэл Цөмийн энергийн газрынхантай уулзсан байх. Учир нь Цөмийн энергийн газар Ерөнхий сайдын шууд мэдэл дор байдаг. Яамны харьяанд байдаггүй.
- Малчид эсэргүүцлээ үргэлжлүүлэн хийх болов уу?
- Төрөөс зөвшөөрөл авсан гадаадын хөрөнгө оруулалттай компанийн үйл ажиллагааг хууль бусаар зогсоож хохирол учруулсан гэж малчдыг буруутгаж байгаа. Бүр малчдыг цагдаагийн газарт мэдүүлсэн байна.
- Гал үндэстэн холбооныхон энэ хэрэгт бас нэр холбогдсон гэсэн?
- Малчид сэтгэл зүйн хувьд хүнд цохилтонд ороод байгаа. Эрүүгийн хэрэгтэн болчихсон дээрээс нь төлбөрт унасан байдалтай байна. Кожегоби компанийн зүгээс "Гал үндэстэн" холбооны удирдагч Энхбаяр, Энхбуянт гэх хоёр хүний нэр дээр цагдаагийн газарт гомдол гаргасан байна лээ.
Малчид болон Кожегоби компанийн хоорондын урт удаан тэмцэлд Кожегоби компанийн ялав. Харин малчид бууж өгөх үү, эсэргүүцлээ үргэлжлүүлэн хийх үү гэдэг нь хэсэг хугацааны дараа тодорхой болно.
Ямартай ч Кожегоби компани Улаанбадрах сумын мал болон малчдад маш их хохирол учруулж байгаа талаар нутгийнхан ярьж байгаа. Ураны хайгуулаас болж тус суманд хоёр толгойтой хурга, сохор ботго, хөлгүй ишиг гэх мэт гажигтай төл ихээр мэндэлсэн бөгөөд бэлчээртээ явж байсан эрүүл мал шалтгаангүйгээр үхэж байгаа юм.
Т.Энхэлээ
Сэтгэгдэл (3)