“Оюутолгой” компаниас хууль бусаар халагдсан гэж шүүхэд хандсан С.Гантуяа анхан болон дунд шатны шүүхэд тус компанийг ялсан. Тэрбээр “Оюутолгой” компанийг монгол ажилчдыг ялгаварлан гадуурхаж, гадаад ажилчдад илүү цалин өгдөг гэж мэдэгдснийхээ төлөө ажлаасаа халагдсан  юм. Харин “Оюутолгой” компани С.Гантуяагийн эсрэг дээд шүүхэд давж заалдаад байгаа. Одоогийн байдлаар тус шүүх хурлын тов гараагүй байгаа юм. Харин С.Гантуяа Оюутолгой төслийг удирдаж байгаа Рио Тинтогийн хөдөлмөр эрхлэлтийн эсрэг стратегийн ач холбогдол бүхий өмгөөллийг эхлүүлэхээр болжээ.

    Тэрээр энэ талаар ярихдаа “Оюутолгойг удирдаж байгаа Рио Тинто компани нь Монгол Улсын төдийгүй олон улсын гэрээ конвенцийг аймшиггүйгээр зөрчиж байна. Үүнд: Хөдөлмөрийн хууль, Яамны эрхзүйн тухай хууль, Монгол Улсын Үндсэн хууль, НҮБ-ын Хүний Эрхийн Тунхаглал, Даян дэлхийн гэрээ, ОУХБ-ын 100 болон 111-р конвенц, Эдийн Засгийн хамтын ажиллагаа, хөгжлийн бодлогын заалт зэргийг бүдүүлгээр зөрчиж байгаа бөгөөд үүнийгээ засахыг төрийн эрх бүхий байгууллагууд шаардаад ч бардаггүй ийм байдлыг үүсгээд байна. "Рио Тинто" нь их мөнгө зарж өөрсдийгөө сайхан харагдуулах гэдэг ч тэд дэлхийд хар данстай, бохир компани гэдэг нь дэлхийн бусад улсад ажилласан тэдний түүхээс илхэн харагдаж байна. Өнөөдөр бид "Рио Тинто"-ийн энэ их мөнгө цацаж толгой угааж байгаа дүр төрхөд нь итгэхийн аргаггүй юм. Учир нь Австралийн Ерөнхий Сайд асан Боб Хаувкэ хэлэхдээ "Рио Тинтогийн Үйлдвэрчний Эвлэлийг үйл ажиллагаанаасаа арчиж хаях гэсэн зарчим нь нийтлэг эрх ашгийг хохироосон заналхийлэл болоод байна" гэж хэлсэн. Мөн 2008 онд Норвеги улс Засгийн газрын тэтгэвэрийн фондоосоо Рио Тинтог хассан. Учир нь Индонез дахь Рио Тинтогийн уурхайд хүний эрхийг хэтэрхий зөрчиж, байгаль орчныг хордуулж улмаар Рио Тинто нь гэмт хэргийн шинжтэй зүйлүүдэд холбогдож байсан тул бохир компаниас татгалзсан хэрэг. Монголчууд бид эх нутагтаа хүний ёсоор, ялгаварлан гадуурхагдалгүй, шударга хөдөлмөрийн гэрээтэй, шударга цалин хөлс авч ажиллах эрхтэй бөгөөд бидэнд Рио Тинтогийн мөнгөнөөс илүү тэдний хүндлэл хэрэгтэй гэдгийг дахин сануулмаар байна. Тиймээс би тус компанийн эсрэг стратегийн өмгөөлөл эхлүүллээ” хэмээн ярьжээ.