Баянзүрх дүүргийн 14 дүгээр хорооны нутаг дэвсгэрт байрлах “Нарантуул" олон улсын худалдааны төвийн хүнсний зах шатсаны улмаас хүний амь нас хохирсон төдийгүй маш олон хүн хохирол амсаад байгаа. Одоогоор хэргийн газрын үзлэгийг явуулж байгаа боловч галд хамрагдсан объектийн талбайн хэмжээ том агуулахад хохирогч нарын маш их хэмжээний бараа байгаа бөгөөд түүнийг тоолох, хохирлыг тогтоох зэрэг ажиллагааг явуулж байгаа юм.

Харин хэрэгт холбогдуулан дөрвөн хүнийг сэжигтнээр тооцон цагдан хорьж, 16 хүнийг хохирогч, иргэний нэхэмжлэгчээр тогтоон байцаалт авч, гал гарч байсныг харсан болон “Нарантуул" ОУХТ-ийн удирдлага менежер, зохион байгуулагч, ажилчид зэрэг гэрчүүдийг байцаах зэрэг мөрдөн байцаалтын шаардлагатай ажиллагаануудыг цаг алдалгүй шуурхай явуулж байгаа.

Тэгэхээр дөрвөн хүнийг сэжигтэнд тооцон эрүүгийн хэрэг үүсгэн цагдан хориноо гэдэг гал гадны нөлөөтэй гарсныг баталж байгаа юм. Мөн дөрвөн хүнийг холбогдуулан шалгаж байгаа нь хэргийг зохион байгуулалтай хийсэн байж болзошгүй гэсэн таамгийг дэвшүүлэлэхд хүргээд байна. Хэрэв эдгээр дөрвөн хүн хэргийг хийсэн нь  мөрдөн байцаалтын явцад тогтоогдвол галыг зохион байгуулалттайгаар бүлэг этгээдүүд хийсэн болж таарна.

 Сэжиглэгдсэн дөрвөн хүний талаар  дэлгэрэнгүй мэдээллийг авахаар ЦЕГын хэвлэл мэдээллийн ажилтан Ё.Лхагвасүрэнгээс тодруулахад "Тэдгээр хүмүүс тус захад ажилладаг нь тогтоогдсон. Тэднийг эрүүгийн хуулийн 189,2-оор эрүү үүсгэж цагдан хорьсон. Энэ заалтад нь хэргийн улмаас хүний амь нас хохирсон, бусад хүнд хор уршиг, онц их хэмжээний хохирол учирсан бол гурваас дээш таван жил хүртэл хугацаагаар хорих ял шийтгэнэ хэмээн заасан байдаг. Хэргийг шалгаж байгаа учир эдгээр хүмүүсийн талаар дэлгэрэнгүй мэдээлэл өгөх боломжгүй" гэв.

Тэгэхээр өнөөх “Дүнжингарав”-ыг сэжиглээд байгаа хүмүүсийн хувьд энэ хэрэгт эргэлзээ төрөх нь тэр. Мөн сэжигтнүүд одоогоор яг ямар ажил эрхэлдэг хүмүүс байсан нь тодорхойгүй байгаа учир тэдгээр хүмүүс дотор жижүүр, цэвэрлэгч, манаач эсвэл бүр удирдлагаас нь ч байж  болзошгүй юм. 

Хамгийн гол нь эдгээр хүмүүс галыг санаатай тавьсан бол байдал өөрөөр эргэнэ. Учир нь ямар учраас гал тавьсан бэ гэдэгт хэргийн гол учир орших юм. Яагаад гэхээр хэрэв эдгээр сэжиглэгдсэн хүмүүс бүгд жижүүр, манаач, цэвэрлэгч гэх мэтийн үйлчилгээний ажилтнууд бол тэд хэн нэгнээс хэд гурван төгрөг авч хэргийг үйлдсэн байж болзошгүй. Харин удирдлагууд, эсвэл удирдлагуудын хамаатнаас хэрэгт холбогдсон бол өрсөлдөгч гээд байгаа “Дүнжингарав”-ынхаа нэр төрд халдах гэсэн оролдлого болж таарах байх.

Ямартаа ч зарим эх сурвалжийн хэлж буйгаар УИХ-ын гишүүн асан Ш.Сайхансамбуугийн эхнэрийг Г.Оюунсогоог сэжигтнээр татан цагдан хорьсон гэв.

“Нарантуул”-ын гэх тодотголтой энэ хэргийг олон түмэн одоо ч анхааралдаа авч, ажигласаар байна.