"Орхон” худалдааны төвийн газрын маргаантай холбоотой асуудлаар тус худалдааны төвийн удирдлагууд мэдээлэл хийлээ. Түрээслэгчдийн зүгээс “Орхон” худалдааны төвийн удирдлагуудыг их хэмжээний мөнгө залилж авсан хэрэгт буруутгаад байгаа. Мөн түрээслэгчдийн хэлж байгаагаар “Орхон” худалдааны төвийн захирал нь хүний газрыг хууль бусаар авч барилга барьсан, цаашлаад хандив нэрээр их хэмжээний мөнгийг авсан болж таараад байгаа юм. Хамгийн сүүлд л гэхэд түрээсээ үндэслэлгүйгээр нэг дахин нэмж, их хэмжээний мөнгө нэхэн түрээслэгчидээ дарамталж, хөөсөн гэсэн билээ. Тиймээс хөөгдсөн түрээслэгч нар ШӨХТГ-т гомдол гаргаснаар, тус худалдааны төвийн үйл ажиллагаа түр зогсоод байгаа юм.

Тэгвэл "Орхон" худалдааны төвийн удирдлагууд өнөөдөр хийсэн хэвлэлийн хурлын үеэр ярихдаа " "Орхон" худалдааны төвийн газрыг анх "Дилма" компанийн захирал Агваан гэдэг хүн эзэмшдэг байсан. Хожим "Батсервис" компани Агваанаас хууль ёсных нь дагуу газрыг нь худалдаж авсан. Эзэмшигч, худалдан авагч хоёрын хооронд хууль ёсны тохиролцоо, наймаа хийгдэж тус газрыг "Батсервис" компани 100 хувь өөрийнхөө нэр дээр шилжүүлсэн. Ингээд Агваанаас худалдаж авсан газар дээрээ 2004 онд "Орхон" худалдааны төвийг бариад, үйл ажиллагаагаа хэвийн явуулж байтал асуудал үүссэн. Тодруулбал Агваан өөрөө тохиролцож, газраа зарчихаад "Миний газар дээр хууль бусаар барилга барьсан. "Орхон" худалдааны төвийг нүүлгэж өг" гэж хэлэн шүүхэд хандсан. Газрын маргаантай холбоотой асуудал шүүхээр удаа дараа хэлэлцэгдсэний эцэст шүүхийн шийдвэр манай талд гарсан. "Орхон" худалдааны төвийн газрын хууль ёсны эзэмшигч нь "Бат сервис" компани мөн байна гэсэн шийдвэрийг дээд шүүхээс гаргасан. Удаа дараа дээд шүүхийн шийдвэр "Бат сервис" компанийн талд гарсан байхад хүчин төгөлдөр бус, хуурамч бичиг баримтуудаар түрээслэгч нарыг төөрөгдөлд оруулж, худалдаачдийг бидний эсрэг хөдөлгөж эхэлж байгаа Агвааныг үнэхээр гайхаж байна. Түрээслэгч нар ч хуурамч бичиг баримтад итгэн "Энэ газрын өмчлөгч Агваан юм байна. Агвааны талд орвол надад лангуу олдчих юм шиг байна" гэсэн байдлаар хандаж байна.  Өнөөдөр үүссэн нөхцөл байдлаас болоод бусад түрээслэгч нар хохирч, "Орхон" худалдааны төв хаалгаа барихад хүрээд байна. Иргэд үнэн мэдээлэлд итгээсэй. Манайх түрээсийн төлбөрийг нэмээгүй. Түрээсийн төлбөрийг татварын хэмжээтэй уялдуулан нэмэхээр түрээслэгчдийн дунд санал асуулга явуулж эхлэнгүүт л "нэмчихлээ" гэсэн худал мэдээллийг хэвлэлээр цацаж эхэлсэнд гайхаж байна. Мөн түрээслэгчдийг дарамталж 67 сая төгрөг аваагүй. "Орхон" худалдааны төвийн урд талын нийтийн эзэмшлийн талбайг машины зогсоол болгож засахын тулд түрээслэгчдээс хандив болгож мөнгө авсан. Хандивын мөнгөөрөө хогонд дарагдаад байсан талбайг засч машины зогсоол болгосон юм. Одоо үйлчлүүлэгч нар амар тайван машинаа тавиад манай худалдааны төвөөр үйлчлүүлж байна. "Олон нийтийн ажилд мөнгөө хандивлав" гэсэн түрээслэгч нарын гарын үсэгтэй баримт ч байгаа.  Бид 7 сарын 1-ээс 8 сарын 15-ны өдрийг хүртэл түрээсээ аваагүй байна. Ийм байхад худал мэдээлэл цацаж олон хүнийг хохироож байгаад гомдолтой байна. Ойлголцохгүй байгаа түрээслэгч нар захиргаан дээрээ ирж уулзаач" гэж хэллээ.