Баянзүрх дүүргийн шүүхийн Эрүүгийн танхимд хүүгээ заазуурдаж гэмтээсэн Н.Довжинсүрэн гэгчийн шүүх хурал болж өндөрлөлөө. Түүнийг Эрүүгийн хуулийн тусгай ангийн 181.3, 100.1-т зааснаар буруутган шүүж Баянзүрх дүүргийн шүүхээс 7 жил 6 сарын ял оноолоо. Тэгвэл хурлын шийд гарахаас өмнө “Лантуун дохио” бүлгэмийн тэргүүн Ч.Ганжавхлангаас хэдэн зүйл тодруулсан юм.

-Хүүгийн биеийн байдал хэр байна?

-Хүүгийн биеийн байдал сайжирсан байгаа. Хүүхдийн бүх шарх сорви нь эдгэсэн өнөөдөр эмээгийндээ ээж, дүү нартайгаа сайхан амьдарч байна. Ээж нь “Жигүүр гранд” грүппт ажилд орсон. Тиймээс хүүгийн хувьд ямар нэг асуудал алга.

Хамгийн гол нь өнөөдөр шүүх хурал яаж шийдэгдэх нь вэ гэдэгт бид найдлага тавьж хүлээж байна. Хохирогч мөн өмгөөлөгчийнх нь шийдвэрээр шүүх хурал хаалттай хуралдахаар шийдэгдсэн. Шалтгаан нь бол мэдээж насанд хүрээгүй хүүхдийн асуудал хөндөгдөж байгаад оршино.

180.3, 100.1 гэсэн зүйл ангиар зэвсэг буюу зэвсгийн чанартай зүйлээр хүнд гэмтэл учруулсан байнгын дарчлаан зовоосон эдгээр зүйл ангиудаар 7,9 жил ял авна гэж бодож байна.  Мөн 100.1 буюу байнгын тарчлаан зовоосон гэдэг зүйл анги маш чухал байна. Энэ бол манай Монголд хэр баргийн шийдэгддэгүй мөртлөө байнга нийтлэг болж байдаг хэрэг . Хүүхдээ, эхнэрээ зодож байдаг хүмүүс ял сонсдоггүй.

-Тэгэхээр өөрийн чинь хэлж буйгаар урьд нь ийм хэрэг гарч байсан ч шүүхээр таслагддаг нь цөөхөн гэсэн үг үү?

-Анхных гэж хэлж болохгүй ч их ховор шийдэгддэг. Учир нь манай улсад гэр бүлийн хүчирхийллийг ахуйн шинжтэй хэрэг гэж үзээд хоорондоо зогц гэсэн байдлаар үздэг.  Хүмүүс ер нь эхнэр, хүүхдээ зодохыг гэмт хэрэг гэж ойлгодоггүй, гэр бүлийн асуудал гэж боддог болсон. Гэтэл байнгын тарчлаан зовоож, удаа дараа зодвол энэ чинь ял авдаг гэмт хэрэг юм байна гэдгийн жишээ энэ хэрэг юм.

Энэ хүүгийн хэрэг бол хэдэн зуун монгол хүүхдийг төлөөлж байгаа тул энэ хэрэг яаж шийдэгдэж байгаагаас бид олон зүйлийг сурч авах юм. Хүүхдээ зодсон, эхнэрээ зодсон хүн ийм ял авдаг гэдгийг харуулах хэрэгтэй.

-Хүүгийн болоод ар гэрийнхнийх нь сэтгэл санаа ямар байна вэ?

-Хүүгийн хувьд хүүхэд л болохоор цайлган, өмнөх хар бараан дурсамжаа бодож шаналах нь бага. Мэдээж төрсөн эцэгтээ өс санаад явахгүй нь лавтай. Гэхдээ энэ бүхэн шарх болоод үлдэж байгаа.