“Нарантуул”-ын хүнсний захыг шатаасан хэрэгт холбогдуулан дөрвөн хүнийг сэжигтнээр тооцон цагдан хорьж, 16 хүнийг хохирогч, иргэний нэхэмжлэгчээр тогтоон байцаалт авч байгаа талаар бид мэдээлсэн. Мөн  гал гарч байсныг харсан болон “Нарантуул" ОУХТ-ийн удирдлага менежер, зохион байгуулагч, ажилчид зэрэг гэрчүүдийг байцаах зэрэг мөрдөн байцаалтын шаардлагатай ажиллагаануудыг явуулж байгаа.

Харин  дөрвөн хүнийг сэжигтэнд тооцон эрүүгийн хэрэг үүсгэн цагдан хорисныг хүмүүс янз бүрээр л ярих боллоо.

 Тухайлбал,  энэ хэргийг зохион байгуулалтай хийсэн гэж зарим нь үзэж байхад “Дүнжингарав”-аас мөнгө авч үйлдсэн гэх хүмүүс ч байна. Түүнчлэн, “Нарантуул”-ын удирдлагууд өөрсдөө “Дүнжингарав”-ын нэр төрд нөлөөлөх гэж ийм зүйл хийлээ гэх иргэд ч олон байгаа юм.

Тэгвэл өчигдрөөс эхлээд бүр “Нарантуул”-ын удирдлагуудыг буруутгасан утгатай худал мэдээлэл олон нийтийн дунд тархах боллоо. Энэ хүмүүсийг гайхшралыг ихэд төрүүлж байна. Учир нь энэ яриа ганц мэдээллийн хэрэгслээр биш хүмүүсийн гар утсанд мессежээр хүртэл очсон талаар цагдаагийн байгууллагаас нэн даруй мэдэгдэв.

Тодруулбал,  “Энх арслан гүүр”   гэх нэрээр зарим хүмүүсийн гар утсанд “Нарантуул шатсан хэрэгт холбогдуулан Ш.Сайхансамбуугийн эхнэрийг  цагдаагийн байгууллагаас цагдан хорилоо” гэх мэдээлэл очоод байгаа юм байна. Мөн зарим мэдээллийн хэрэгслээр ч энэ нэрийн дор мэдээлэл цацсан болохыг цагдаагийн байгууллагаас мэдэгдэж энэхүү газрыг хайж олж хариуцлага тооцохоо мэдэгдсэн юм.

Тэгвэл “Энх арслан гүүр” гэх энэ нэрийн дор хэн ийм ажиллагаа явуулж байгаа талаар цагдаагийн байгууллагын хэвлэл мэдээллийн ажилтан Ё.Лхагвасүрэнгээс асууж лавлахад,

-Ш.Сайхансамбуугийн эхнэрийн талаар худал мэдээлэл цацсан гэсэн үү?

-Бид одоогоор шалгаж байна. Ямар ч байсан цагдаагийн байгууллагад шалгагдаж байгаа хэргийн талаар ингэж худал мэдээлэл тараах нь санаатай явуулга. Зарим үүрэн операторыг ашиглаж хүмүүсийн гар утсанд мессеж тараасан байна лээ. Бас хэвлэл мэдээллийн хэрэгслээр ч цацсан. Гар утсанд болон хэвлэл мэдээллийн хэрэгслээр Ш.Сайхансамбуугийн эхнэрийг “Нарантуул”-ын хэрэгт буруутган цагдан хорилоо гэсэн мэдээллийг тараасан.  Тэгвэл Ш. Сайхансамбуугийн эхнэр Г.Оюунсогоог цагдан хорисон зүйл байхгүй. Ямартаа ч энэхүү худал мэдээлэл цацсан хэргийг шалгаж эзэн холбогдогчид нь хариуцлага татах болно.

-Яг аль үүрэн оператораас энэхүү мессеж цацагдсан бэ?
-Одоогоор яг аль үүрэн оператороор мессеж тараасныг хэлэх боломжгүй.  Тэгээд ч мессежийг цацсан үүрэн операторт хариуцлага тооцохгүй. Зөвхөн шалгагдаж байгаа хэргийн талаар худал мэдээлэл тараасан тухайн газрыг л илрүүлж хариуцлага тооцно.

-“Энх арслан гүүр” гэдэг нь байгууллага юм уу?

-Байгууллага, компани, хувьд хүн хэл болохыг сайн мэдэхгүй байна.

-Тэгэхээр Ш.Сайхансамбуугийн эхнэрийг цагдан хорьсон зүйл байхгүй сэжигтнээр татсан хэрэг үү?

- Ш.Сайхансамбуугийн эхнэр Г.Оюунсогоо болон захын ажилтнуудад хөдөлмөр хамгаалал, аюулгүй ажиллагааны дүрэм зөрчсөн хэрэгт буруутган сэжигтнээр татсан. Гэвч хорьж цагдсан юм байхгүй. Гадуур байцаалт авч байгаа.

Ямартаа ч сонгуулийн сурталчигаа шиг гар утсанд нь гүтгэлгийн шинжтэй мессеж хүртэл явуулж байгааг бодоход "Нарантуул"-ын удирдлагуудыг овоо хараандаа зуусан ямар нэгэн хүн байхыг үгүйсгэхгүй юм. Харин чухам хэн бэ гэдэг нь л олон түмний сонирхолыг ихэд татаж байна.