“Бурхан хүнийг бүтээдэг, бусдыг нь барилгачид бүтээдэг” гэх хуучны үг бий. Энэ үгийн биелэл болгох учиртай ирээдүйн барилгачид өчигдөр шинэ хичээлийн жилийн нээлтээ хийлээ. Хөдөлмөрийн яамны харьяа Барилгын политехникийн коллежид энэ жил 800 орчим оюутан суралцана. Ингэхдээ барилгын арван мэргэжлээр 600 оюутан мэргэжил эзэмших бол, 200 орчим нь техникчийн ангийг сонгожээ. 60 жилийн түүхтэй тус сургууль бүтээн байгуулалтын салбарт олон мянган мэргэжилтийг амжилттай бэлтгэсээр ирсэн. Энэ жил ч гэсэн нийгэмд эрэлттэй мэргэжлүүдийн талаар судалгаа хийж, элсэлтээ авсан гэж байлаа. Үйлдвэржиж, барилгажих их зорилтын өмнө ирээд буй Монгол Улс залуучуудаа гадагшаа гарч ажил хайж хийх биш, эх орондоо ихийг хийх чадварлаг мэргэжилтэн болгон бэлтгэхэд анхаарах учиртай. Энэ үйлсэд идэвхийлэн зүтгэж буй байгууллагуудын нэг нь О.Тлейханы нэрэмжит Барилгын политехник коллеж юм. Тус сургууль чадварлаг мэргэжилтнүүдийг зах зээлд нийлүүлэх зорилтын хүрээнд олон төсөл хөтөлбөр хэрэгжүүлж буй. Тухайлбал Монголын мянганы сорилтын сангийн төслөөр өнгөрсөн хичээлийн жил хоёр тэрбум төгрөгийн хөрөнгө оруулалтыг Барилгын политехник коллежид хийсэн аж. Ингэснээр оюутнууд эзэмшиж буй мэргэжлээрээ мэргэших дадлагын долоон байраа иж бүрэн тоноглосон гэнэ. Мөн сургалтын орчинг сайжруулах, бусад дадлагын газруудыг засварлах ажлуудыг амжилттай хийжээ. Харин энэ жилийн тухайд Хөдөлмөрийн яам Герман улстай хамтран хэрэгжүүлж буй Мэргэжлийн боловсрол төслийг тус сургуульд мөн хэрэгжүүлэх юм байна. “Мэргэжлийн боловсрол” төсөл МСҮ-ийн гурван төвийг олон улсын жишиг хэмжээнд хүрэхүйцээр хөгжүүлэх зорилготой.
Энэ гурван сургуулийн нэг нь О.Тлейханы нэрэмжит Барилгын политехник коллеж юм. Тус төслийн сургагч багшийн хэлснээр оюутнуудыг мэргэжлийн дадлагын шинэ объекттой болгожээ. Орчин үеийн техник төхөөрөмжүүдээр тоноглосон уг төв нь чадварлаг мэргэжилтнүүдийг төгсгөх үндэс суурь болох нь дамжиггүй. Хурдтай хөгжиж буй манай улсын барилгын салбарын ажиллах хүчийг вагон вагоноор орж ирэх хятад ажилчид эзэлдэг байсан цаг саяхан. Монголын мэргэжилтнүүд нь дутаж, мэдлэг чадвар нь гологддог гэх ойлголтыг тус сургуулийн төгсөгчид удахгүй халах биз. МСҮТ-үүдийг төрөөс идэвхтэй дэмжиж буй. Тиймдээ ч мэргэжлийн боловсрол эзэмшиж буй ирээдүйн боловсон хүчнүүд суралцаж буй хугацаанд нь төр хөдөлмөрийн хөлсний доод хэмжээтэй тэнцэх урамшууллыг сар бүр олгож байх юм. Мөн амжилттай суралцагсдын өмнө ажлын байр бэлэн. Хичээлийн шинэ жилийн нээлтийн үеэр Хөдөлмөрийн сайд Я.Санжмятав тус сургуулийн багш, оюутнуудад хандан цахим мэндчилгээ дэвшүүлсэн юм. Тэрбээр мэндчилгээндээ “Та суралц. Бид танд мэргэжил олгоё. Хийе бүтээе гэсэн эрмэлзлэл танд байгаа бол Монгол Улсын хувийн болон төрийн байгууллага хүлээн авахад бэлэн байна. Монгол Улсын Засгийн газар та бүхэнтэй хамтран ажиллаж, мэргэжилтэй ажилтан бэлтгэх чиглэлээр улам ихийг хийх эрмэлзлэл дүүрэн байгаагаа илэрхийлье” гэсэн юм.
Түүнчлэн нээлтийн ажиллагаанд Хөдөлмөрийн яамны дэд сайд Батхуяг оролцсон. Улс орныг үйлдвэржүүлэх Засгийн газрын мөрийн хөтөлбөр мэргэжилтэй ажилтнуудаас ихээхэн шалтгаалахыг тэрбээр онцолж байв. Тиймээс үндэсний мэргэжилтнүүдээ бэлтгэдэг сургуулиудаа цаашид ч дэмжин ажиллахаа илэрхийлсэн.
