Хүний эрхийн үндэсний комиссоос хийсэн болон хийх гэж буй ажлынхаа талаар сар бүр танилцуулдаг билээ. Энэ үүднээс тэд  өнгөрсөн сард хийсэн ажлаа танилцуулж хэвлэлийн хурал хийлээ. Хуралд хүний эрхийн үндэсний комиссын дарга Ж.Бямбадорж тэргүүтэй хүмүүс оролцсон юм. Өнгөрсөн сарын хугацаанд хүний эрхийн үндэсний комисс хурдан морь унаач хүүхдүүдийн амь нас эрүүл мэндийн асуудалд анхаарал хандуулж ажилласан байна. Хүний эрхийн үндэсний комиссын дарга Ж.Бямбадорж энэ талаар хэлэхдээ “Наадам болох бүрд бид үнэхээр их санаа зовж байлаа.  Гиннесийн номонд бичигдэх морин уралдаанд 3000 морь уралдсан. Үүнээс болж хүүхдийн эрх зөрчигдөж магадгүй гэж их санаа зовж байлаа. Энэ үеэр бид амарч байсан. Гэхдээ бүгд цуглаж тэнд ажилласан. Учир нь төр засгийн байгууллага хэрэг  зөрчлийг нуугаад байна. Энэ жил болсон том наадмуудад хэдэн хүүхэд гэмтсэн бэ гэдэг мэдээлэл өнөөдөр алга. Хүүхдийн төлөө газар гэж нэг байгууллага байдаг. Засгийн газрын хэрэгжүүлэгч агентлаг юм. Энэ газар юу хийдэг юм. Бүү мэд. Тухайн үед чимээ сураг ч байхгүй байсан. Аргаа бараад Гиннесийн номонд бичигдэх үеэр бид өөрсдөө ажилласан. Гэмтлийн эмнэлэг дээр манай гурван ажилтан жижүүрлэж ажилласан. Бид цагдаа холбогдох газруудаар нь хөөцөлдөж явж, яг уралдаан болсон газруудад самналт явуулж, мориноос унасан хүүхдийн тоог гаргасан. Хэрвээ бид очоогүй байсан бол хэдэн хүүхэд мориноос унасан нь тодорхойгүй байх байсан" гэсэн юм.

 Мөн сүүлийн үед эрүүдэн шүүх ажиллагааны талаарх гомдол санал Хүний эрхийн үндэсний комисст их ирдэг болсон талаар тэрээр дуулгалаа. Хүмүүсийг айлгадаг, сүрдүүлдэг, үг зааж өгдөг, гарын үсэг хүсээр зуруулдаг хэргүүд ихээр гарах болжээ. Хууль хяналтын байгууллага нь юун түрүүнд хүний эрүүдэн шүүдэггүй ч ямар нэгэн байдлаар хүчээр хэргийг нь тулгах явдал байгаа аж. Тиймээс Хүний эрхийн үндэсний комиссоос УИХ хүний эрхин дэд хороотой хамтарсан уулзалт зохион байгуулж эрүүдэн шүүх ажиллагааны эсрэг тэмцэх ёстой гэв.