Иргэдийн шударга шүүх”-ын тэргүүн Х.Бат-Ялалт, “Хөх монгол” бүлгэмийн тэргүүн Ч.Мөнхбаяр  болон “Зөв Монголын төлөө” ТББ-ын төлөөлөлүүд Хуульчдын холбоо болон хуулийн байгууллагын хууль бус үйл ажиллагааны талаар өөрсдийн байр сууриа илэрхийлж мэдээлэл хийлээ.

Энэ талаар “Иргэдийн шударга шүүх” төвийн тэргүүн Х.Бат-Ялалтаас хэдэн зүйл тодрууллаа.

-Өнөөдрийн хэвлэлийн хурлын талаар?

-Өнөөдөр "Иргэдийн шударга шүүх" төрийн бус байгууллага, "Хохирогчдын холбоо", "Хөх Монгол бүлгэм" хамтран “Хүчирхэг Монголын төлөө” хөдөлгөөн байгуулж байна. Цаашлаад иргэд болон төрийн бус байгууллагууд бүх ашиг сонирхолоо нэгтгээд нэгдсэн хөдөлгөөний зохион байгуулалтанд орох юм.

-Энэхүү төрийн бус байгууллага, холбоод нь бүгд өөр өөрийн ажлын чиг үүрэг, ашиг сонирхолтой. Тэгэхээр нэгдэж чадах уу?
-Төрийн бус байгууллагууд дагнасан тодорхой асуудлуудаар үйл ажиллагаа явуулдаг бол манай байгууллага иргэдийн шударга шүүх, хууль зүйн салбар, иргэдийн засаглалын хүрээнд асуудлыг хөндөж ярьдаг. Тэгвэл “Хөх Монгол” бүлгэм бол үндэсний эрх ашгийг хөндөж асуудал тавьдаг. Тэгэхлээр бид тус тусдаа тавьсан ашиг сонирхолоо нэгтгээд салбар бүрт ажлын хэсэг зохион байгуулж, салбар бүрээр дагнасан төрийн бус байгууллага байгуулагдаж байна. Ихэвчлэн хөдөлгөөнүүд нийгмийн бодит байдлыг шүүмжилдэг. Тэгэхлээр энэ байгууллагууд нэгдээд шүүмжлээд мөн яаж засаж залруулах вэ гэдэг гарц шийдлийг нь хэлээд явья гэж бодож байгаа.

-Эхний ээлжинд ямар ажлууд зохион байгуулах гэж байна?

-Хууль зүйн салбарыг шинэчлэх асуудлыг эхний ээлжинд тавьж байгаа. Хуульчдын холбоог хууль бусаар байгууллаа. Мөн Шүүхийн ерөнхий зөвлөл хууль бусаар байгуулагдсан гэх мэтээр Мордохын хазгай гэдэг шиг хэдийг бид шинэчлэлийг хүсч байгаа ч шинэчлэл маань буруу байгаа юм. Үр дүн нь зөв, ард иргэдэд ашигтай байгаасай л гэж хүсч байна.

-Зүгээр л уриалаад явах уу, эсвэл холбогдох хүмүүстэй нь уулзаад асуудлыг шийдэх үү?

-Бид хэвлэлийн хурлаа хийчихээд тусгай хороодыг байгуулаад явна. Мэдээж төрийн захиргааны дээд байгууллага төрийн өндөрлөгүүдэд шаардлага хүсэлт санал хүргүүлэх замаар л ажиллана. Бидний саналыг хүлээж авах, шийдвэрлэхээс шалтгаалаад үйл ажиллагаа ямар ч хэлбрээр явуулж болно. Ямарваа нэг тэмцэл, жагсаал цуглаан хэлбэр лүү орохгүйгээр асуудлыг хүлээж аваад шийдэж өгөх байх гэж найдаж байна.

-Хууль зүйн сайд Х.Тэмүүжин  таныг болж бүтэхгүй байна гэж яриад явахаасаа гадна бидний хийж буй хурал дээр ирж суугаад өөрийнхөө санал бодлыг илэрхийлсэнгүй гэж байсан. Энэ тал дээр?

-Ер нь бол илэрхийлээд яваад байгаа. Х.Тэмүүжин сайд өөрөө ч шүүхийн шинэчлэл гэдэг зүйлийг хэзээнээс ярьсан нь эргэлзээтэй байдаг. Хоёрдугаарт, бид хоёр яагаад шинэчлэх гээд байгаа гэдэгт өөр өөр хариулт өгөөд байгаа юм. Судалсан судалгаа, аргачлал маань ч гэсэн өөр. Тэгэхлээр эрх барьж нам өөрсдөө хүнийг сонсох, оролцуулах гэх мэт асуудал дээр учир дутагдалтай байдаг. Бид дуудаад уриад тэнд хэлэлцүүлэг болж байна гэхэд нь очихгүй яваад байгаа юм биш.