Баянхонгор аймгийн Гурванбулаг суманд хууль бусаар алт олборлож буй асуудлаар нутгийн иргэд, ТББ-ууд хамтарч мэдээлэл хийлээ. Баянхонгор аймгийн Гурван булаг сумын II багийн нутаг Ихэрийн зүүн салааны нутаг дэвсгэрт "Жи энд Ю Гоулд" компани нь 2006 оноос алт олборлож эхэлсэн байна. Тус компани алт олборлож эхэлснээс хойш "Шар усан гол", "Хар усан гол" ширгэж, сумын төвийн ард иргэд усны гачаалд орсон талаар нутгийнхан мэдээллээ.

"Жи энд Ю Гоулд" компани нь алт олборлож эхэлсэн цагаасаа хойш ганц ч удаа нөхөн сэргээлт хийгээгүй байна. Нутгийн гол ширгэснээс болж иргэд сумаасаа 30 километрийн зайтай газраас ундны усаа зөөж, бусдын зөөвөрлөж ирсэн усыг худалдаж авахаас өөр аргагүй байдалд орсон байна. Харин Жи энд Юу Гоулд компани нь алтны олборлолтоо улам бүр нэмэгдүүлж, Монгол түмэнд Түрэгийн үеийн хөшөө дурсгалаараа алдартай Өвөр хөшөөт гэдэг газар хөрс хуулалт хийж эхэлжээ. Тухайн газар нь түүх дурсгалын газар болоод зогсохгүй, урт нэртэй хуулийн дагуу шороон ордны ашиглалтыг цуцлах 254 дүгээр жагсаалтад багтсан газар ажээ.

Урт нэртэй хуулийн дагуу гол мөрөн, ай савын ойролцоо олборлолт явуулахгүй гэдэг заалтыг илтээр зөрчиж байгаа гэж нутгийнхан ярьж байна.

Тус компани нь Баянхонгор аймгийн Гурван булаг суманд нийтдээ 3 тэрбум гаруй төгрөгийн экологийн хохирол учруулсан байна. Нөхөн сэргээлт хийдэггүй, мөн гол усыг нь ширгээсэн гэдэг үндэслэлээр нутгийн иргэд тус компанийг шүүхэд өгчээ. Шүүхийн шийдвэр ч нутгийн иргэдийн талд гарч, "Жи энд Ю Гоулд" компаниар 3 тэрбум гаруй төгрөгийн нөхөн төлбөр гаргуулахаар болсон байна.  Мөн захиргааны хэргийн шүүхээс тус компанийн үйл ажиллагааг түр зогсоох шийдвэр гарсан ч шийдвэрийг эсэргүүцэж, улсын байцаагчийн лацадсан хаалгыг дураар онгойлгож орсон байна. Цаашлаад хориглосон шийдвэрийг зөрчиж, үйл ажиллагаагаа одоог хүртэл үргэлжлүүлсээр байгаа аж. Ингэж төрийн хуулийг үл тоон нутгийн иргэдийг басамжилж байгаа тус компанийг  цаашид ч эсэргүүцсээр байх болно гэдгээ мэдэгдлээ.

Хараа хяналтгүй олгосон ашигт малтмалын зөвшөөрөл нэг сумын иргэдийг уух усгүй болгоод байхад салбарын сайд нь ямар нэгэн арга хэмжээ одоог хүртэл авахгүй байгаа аж. Тодруулбал байгаль орчны төрийн бус байгууллага, нутгийн иргэд Уул уурхайн сайд Д.Ганхуягтай уулзахад тэрээр дорвитой хариу өгөөгүй байна.

Хар ус, Шар усны гол нь Завхан гол руугаа цутгадаг бөгөөд тэр зүгийн Монголын бүх аймгийн ундны усны бас нэг үүсвэр аж. Гэтэл тус гол "Жи энд Юу Гоулд" алтны олборлолтоос бол ширгэсэн байна. Нутгийн иргэд тус компанийн хооронд өмнө нь хэд хэдэн зөрчилдөөн үүсч байсан ба иргэд нутгаа сүйтгүүлэхгүй гэж гэр хүртэл барин ээлжлэн жижүүр хийн хонож, үйл ажиллагааг нь зогсоож байсан түүхтэй гэнэ.