БШУЯ-наас бага дунд ангийн боловсролын чанарыг дээшлүүлэхээр олон шинэчлэл хийж байгаа. Тэдгээрийн нэг болгож энэ жилээс эхлэн бага ангийн сурагчдын дүнгийн үнэлгээнд өөрчлөлт оруулсан байна. Бага ангийн I-III ангийн сурагчдын хувьд багш нь дүнгийн хуудсан дээр тухайн хүүхдийн сурлагын чадвар болоод хүмүүжлийн талаар үгэн үнэлгээ бичдэг болох юм. Тухайлбал сурагч тааруухан дүн авбал хичээгээрэй гэсэн дүн тавих бол онц дүн авсан тохиолдолд маш сайн байна гэсэн үнэлгээг өгнө.
Мөн IV-V ангийн сурагчдын сурлагын үнэлгээг хувиар тооцож тавих бол V-IX ангийн сурагчдыг үсгэн үнэлгээ болон хувиар тооцох аж. Харин ахлах ангийн сурагчдын үнэлгээний хувьд -A, +A гэх зэргээр дүгнэх бөгөөд улирлын эцсийн дүнг 60 хувийг нь хичээлийн явцад, 10 хувийг ирцээр, 30 хувийг улирлын эцсийн шалгалтаар авах журмыг баталсан байна.
Энэ талаар БШУЯ-ны Стратегийн бодлого, төлөвлөлтийн газрын дарга Б.Насанбаяр “ЕБС-ийн сурагчдын хувьд хичээлээ зөвхөн улирлын эцсийн шалгалтад зориулж хийх биш өөрийн боловсролын төлөө хийдэг болох юм. Учир нь эцэг эхчүүд хүүхдийнхээ ур чадвар, сурлагын төвшинд анхаарах биш дүнг харж хүүхдээ дүгнэдэг болоод байна. Тиймээс уг асуудлыг таслан зогсоох зорилгоор шинэ журмыг баталсан. Өмнө нь мөрдөгддөг байсан үнэлгээний журам нь сурагчдын мэдлэгийг шалгадаг байсан. Харин шинэчлэгдсэн үнэлгээний журам нь сурагчдын сурлагын төвшин, ур чадварыг дүгнэдэг болсноороо онцлогтой” гэжээ.
Түүнчлэн ЕБС-ын сурагчдын улсын шалгалтын журамд өөрчлөлт оруулжээ. Өмнө нь ЕБС-ийн сурагчдын улсын шалгалтыг тухайн сургуулийн захиргаа нь эсвэл тухайн аймгийн боловсрол соёлын газраас авдаг байсан бол энэ жилээс эхлэн БШУЯ-ны Стратегийн бодлого, төлөвлөлтийн газраас авахаар болсон байна. Тодруулбал, тав болон есдүгээр ангийн улсын шалгалтыг түүврийн аргаар авах аж. Энэ нь тав болон есдүгээр ангийн хүүхдүүд улсын шалгалт өгөх биш түүврийн аргаар сонгогдсон аймаг, сумын сурагчид улсын шалгалт өгнө гэсэн үг.
Харин 11 дүгээр ангийн бүх сурагч улсын шалгалт өгөх бөгөөд шалгалтын үнэлгээ нь элсэлтийн ерөнхий шалгалттай нь шууд хамааралтай болж байгаа бөгөөд энэ нь ирэх жилээс мөрдөгдөж эхлэхээр болжээ.
