Хэд хоногийн өмнө ШУТИС-ийн хэсэг оюутнууд сургалтын төлбөр нэмэгдэж буйг эсэргүүцэж мэдээлэл хийсэн билээ. Жил бүр сургалтын төлбөр нэмэгдэж байгаа ч сургалтын орчин муу байгаа болон ТУЗ-ын зөвлөлд оюутны төлөөллөөс хүн оруулалгүй удирдлагууд нь дураараа төлбөр нэмсэн гэж тэдгээр оюутнууд хэлж байсан юм. Тиймээс оюутнууд эдгээр өдрүүдэд сургуулийнхаа гадаа эсэргүүцлийн жагсаал хийж байгаа юм.
 
Тэгвэл өнөөдөр ШУТИС-ийн төгсөх курсийн оюутнууд үүсээд буй үйл явдалтай холбогдуулан хэвлэлийн бага хурал хийлээ. Тэд энэ талаар ярихдаа "Оюутнууд бидний үүрэг бол сурах. Тиймээс сургуулийн гадаа сайн дураараа жагсаал цуглаан хийж суугаа оюутнуудыг хичээлдээ оролцохыг уриалж байна. Хоёрдугаарт манай сургуулийн оюутны холбоо улсын бүртгэлийн газарт албан ёсны бүртгэлгүй хууль ёсны бус газар. Тэгсэн мөртлөө оюутны холбоонийхон жил бүр сургуулийн мөнгөнөөс 180 сая төгрөгийг  зарцуулдаг гэсэн баримт байна. Төлбөр нэмэгдсэн нь мэдээж оюутнуудад хүндээр тусч байгаа. Гэхдээ бидний дуу хоолойг сургуулийн удирдлагуудад хүргэх ёстой байгууллага маань хууль бус байна. Мөн одоо оюутнуудыг уриалан дуудаж, жагсаал цуглаан хийгээд байгаа хүн өөрийнхөө хувийн эрх ашгийн төлөө ажиллаж байна. Тухайлбал жагсаалыг зохион байгуулж байгаа оюутан "Сургуулийн ТУЗ-д намайг оруулчих. Тэгвэл би гадаа байгаа оюутнуудыг тараана" гэж хэлж явна. Ингэхээр эрх ашгийн төлөө оюутнуудыг турхирч байна гэдэг нь ойлголомжтой. Жил болгон тамга тэмдэг нь өөрчлөгддөг хууль бус байгууллагын өмнөөс оюутнууд жагсах ёсгүй. Оюутны холбоо жил бүр 180 сая төгрөгийг яг юунд зарцуулдаг нь мэдэгддэггүй. Тиймээс хууль ёсны бус байгууллага байж, эрх ашгийн төлөө жагсаж байгааг эсэргүүцэж байна" гэсэн юм.

 ШУТИС-ийн гадаа жагсаал хийж буй оюутнууд сүүлийн өдрүүдэд тэмцлээ хурцатгаж, цаасанд боосон чулууг сургуулийн удирдлагуудын цонх руу удаа дараа шиджээ. Тиймээс оюутнууд хичээлээ тасалж, жагсаал цуглаанд оролцож явахын оронд хичээлээ хийх хэрэгтэй гэж өнөөдөр мэдээлэл хийсэн оюутнууд хэлсэн юм.

Тэгээд ч тус сургуулийн ихэнхи оюутнууд төлбөр нэмэгдсэнийг эсэргүүцээгүй гэв. Харин ч бусад сургуулиудтай харьцуулахад ШУТИС-ийн төлбөр харьцангуй бага нэмэгдсэн гэлээ. Оюутны байр нь мөн адил бусад сургуулиас хямд бөгөөд засвар хийгдсэн тохилог байр гэв.  Мөн эсэргүүцлээ илэрхийлээд буй оюутнуудын хэлж байгаа шиг оюутнууд цементэн шалан зогсоогоороо хичээллэдэггүй гэсэн юм.

Энэ үеэр тус сургуулийн оюутан Б.Азбаяраас цөөн асуултад хариулт авлаа.

-Төлбөр нэмлээ гэж эсэргүүцэж байгаа оюутнуудынхаа эсрэг яагаад ийм тайлбар хийх болов?

-Төлбөр нэмэгдэж байгаа нь буруу л даа. Гэхдээ эдгээр залуучууд толгойдоо “Өөрчилье” гэсэн бичигтэй байгаа хэрнээ шал өөр зүйл хэлж яриад байгаа юм. Жишээ нь, бид хичээлдээ суумаар байна, төлбөрөө нэмэхээ зогсоо гэж хашгираад хичээлд сууж байгаа оюутнуудад саад болоод байна. Бид төлбөрөө өгсөн юм чинь боловсролоо авмаар байна. Эдгээр оюутнууд бүр захиргаа руу цаасанд чулуу боож байгаад шидсэн. Тэр цаасан дээр нь “Төлбөр нэмж байгааг эсэргүүцэж байна” гэсэн байсан. Оюутны холбооны тэргүүн болох залуу “Хэрвээ намайг ТУЗ-д оруулчих юм бол би энэ оюутнуудыг хичээлд нь суулгалаа” гэсэн яриа ч гарсан.

-Төлбөр яг хэдэн хувиар нэмэгдсэн юм бэ?

-Нэг кредит нь 44 мянга байгаа. Ингээд бодохоор жилдээ 1 сая 700 төгрөг болж байгаа юм.